கண்ணி - 24,25,26: நக்கு இருந்த - பொருட்படுத்தாது சிரித்துக் கொண்டிருந்த. ‘அக்கணமே மூக்கரிந்து’ என்க. தொக்கு இருந்த -தொகைமிக்கு இருந்த. வண்ணம் - வகை; புகழ். அங்கைத் தலத்தே அணி மாலை - உள்ளங்கையில் வைத்திருத்தற்குரிய செபமாலை, ஆங்கு அளித்த - அப்பொழுதே கொடுத்த. ‘அணி மானை’ என்பதும், ‘ஆங்கணிந்த’ என்பதும் பாடங்கள் அல்ல.

கண்ணி - 26,27,28: திங்கள் - சந்திரன். தக்கன் வேள்வியில் சந்திரன் தரையில் வைத்துத் தேய்க்கப்பட்டான். “அதுவே” என்பதனை, ‘அதனையே’ என உருபுவித்துரைக்க. ‘வாய்த்த’ என்பதன் ஈற்று அகரம் தொகுத்தலாயிற்று. வாய்த்த - தக்கன் வேள்வியில் சென்றிருந்த தேவர்களை மடிவித்துப் பின் எழுப்பியதாகக் கூறப்பட்ட செய்தி இங்குச் சிறையில் அடைத்துப் பின்பு விடுவித்ததாகச் சொல்லப்பட்டது.

கண்ணி - 28,29,30: திரிபுரத்தை யெரித்த பொழுது அவற்றுள் இருந்த பலருள் சிவபத்தியினின்றும் மாறாது உறைத்து நின்ற, ‘சுதன்மன், சுசீலன், சுபுத்தி’ - என்னும் மூவர் திருவருளால் உய்திபெற்றிருந்தனர். திரிபுரத்தசுராகிய தாரகாக்கன், கமலாக்கன், வித்தியுன்மாலி - இவரும், மற்றை யோரும் அழிந்தொழிந்தனர். உய்ந்த மூவரில் இருவர் கோயில் வாயில் காவலராகும் வரத்தையும், ஒருவன் முழவு வாசிக்கும் வரத்தையும் பெற்றனர்.

1. திருமுறை - 1.69.1.