மணங்கமழ் தெய்வத்(து) இளநலம் காட்டி,
அஞ்சல் ஓம்புமதி, அறிவல்நின் வர(வு)என
அன்புடை நன்மொழி அளைஇ, விளிவுஇன்(று)
இருள்நிற முந்நீர் வளைஇய உலகத்(து)

பெறலரும் பரிசில் நல்கும்மதி, பலவுடன்
வேறுபல் துகிலின் நுடங்கி, அகில்சுமந்(து)
ஆரம் முழுமுதல் உருட்டி, வேரல்
பூவுடை அலங்குசினை புலம்ப வேர்கீண்டு

தண்கமழ் அலர்இறால் சிதைய,நன்பல
ஆசினி முதுசுளை கலாவ, மீமிசை
நாக நறுமலர் உதிர, ஊகமொடு
மாமுக முகக்கலை பனிப்பப், பூநுதல்

முத்துடை வான்கோடு தழீஇத் தத்துற்று
நன்பொன் மணிநிறம் கிளரப், பொன்கொழியா,
வாழை முழுமுதல் துமியத் தாழை
இளநீர் விழுக்குலை உதிரத் தாக்கிக்

மடநடை மஞ்ஞை பலவுடன் வெரீஇக்
கோழி வயப்பெடை இரியக் கேழலொ(டு)
இரும்பனை வெளிற்றின் புன்சாய் அன்ன
குரூஉமயிர் யாக்கைக் குடாஅடி உளியம்

ஆமா நல்ஏறு சிலைப்பச், சேண்நின்(று)
இழுமென இழிதரும் அருவிப்
பழமுதிர் சோலை மலைகிழ வோனே.