வரகுணர் இருவருள் ஒருவனே இப் பாட்டில் குறிக்கப்பட்ட வரகுணன்' எனச் சிலர் கூறுதல் ஏற்புடையதாய் இல்லை. எனவே, இவ்வரகுணன் தமிழ் நாட்டில் கல்வெட்டுக்கள் தோன்றுதற்கு முன்னே வாழ்ந்த வரகுணனாவன்.

பொடி - திருநீறு. ஏர்தரு - அழகைத் தருகின்ற. பூசல் - போர்; போர்க்களம். "அடிக்கு" என்னும் நான்காவதை ஏழாவதாகத் திரிக்க. கடி, வடி - கூர்மை. கோயிற் கருவி - அரண்மனையில் உள்ள படைக்கலங்கள். 'அவை யில்லாமல்' என்றது. 'அவைகளை எடாமலே' என்றபடி. அமையும் - ஏற்கும். 'முடியின் கண்' என ஏழாவது விரிக்க.

1084. குறிப்புரை: "இடப்பால் வலப்பால்" என்பது முதலாகத் தொடங்கியுரைக்க. 'இடப்பால் தழலும், வலப்பால் தமருகமும்' என நிரல் நிறையாக இயைக்க. சுழல் வரல் - சுற்றி வருதல், "சுழலும்" என்னும் உம்மை 'வீழ்ந்து பறிந்து' என இறந்தது தழுவிற்று. தோன்றல்கள் - பெருமையுடையவர்கள். கழலும் பசு பாசம் - பசுக்களைக் கட்டியுள்ள பாசம் கழலுபவர். ஆம் இமையோர் - மக்களின் மேலானவராகிய தேவர்கள். தம் கழல் - தமது (சுற்றி வந்தவர்களது) பாதங்கள். அழல் - அன்பினால் கண்ணீர் வார நிற்றல். "அழல்" என்னும் தொழிற்பெயர் 'அழ' என்னும் செயலென் எச்சப் பொருட்டாய் நின்றது. உம்மை சிறப்பு. தருக்கு - பெருமிதம். 'தில்லை யம்பலத்தை வணங்கினோர், தம்மைத் தேவர் வணங்க இருப்பார்கள்' என்பதாம்.

1085. குறிப்புரை: தோன்றல் - பெருமையுடையவன். துள்ளிய - அகங்கரித்த. தோன்றல், தாங்கி, சார்வரியோன், சீரன், நாதன் - இவை ஒரு பொருள்மேல் வந்த பல பெயர்கள். தேன்தலை - தேனின்கண். ஆண்பால் - பசுவின்பால். சீர் - தன்மை. வான் - வானுலகத்திற்கு, தலை நாதன் - மேலான தலைவன். "காண்பது" என்பதற்கு, 'இடைவிடாது காண்பது' என உரைக்க.