வெண்பா

கட்டளைக் கலித்துறை

'இது வியப்பு' என்பது குறிப்பெச்சமாயிற்று. 'தேவ மகள்' என்றே எண்ணாமல், 'மானுட மகளே' என்னும் எண்ணமும் உடன் நிகழ்தலின், மயக்கம் தோன்றிற்று. 'ஒரு வடிவாகிய இது அணங்கோ - அருந்தெய்வமதுவோ' - என முடிக்க. ஐயக் கிளவிகளில் உயர்திணையும், அஃறிணையுமாக விரவி எண்ணுவான் ஆகலின், முதற்கண் 'இவள் ஒருத்தி' என்னாது "ஓர் வடிவு இது" என அஃறிணையாகக் கூறினான்; என்னை? திணை ஐயத்திற்கு 'உருபு' முதலியன ஐயப் புலப் பொதுச் சொற்கள் ஆதலின்¹

1322. குறிப்புரை: இஃது அகப்பொருள் களவியலில் உடன் போக்கின்கண் தலைவியைச் செவிலி பின் தேடிச் செல்லுங் கால் கண்டோரை வினவ, அவர்கள் செவிலிக்குக் கூறிய துறையாகச் செய்யப்பட்டது.

வடிக் கண்ணி - மாவடுவைப் போலும் கண்களை யுடையவள்; தலைவி. கடிக் கண்ணியான் - நறுமணம் கமழும் முடி. மாலையை உடையவன்; தலைவன். பின் வந்த "வடிக் கண்ணி" என்பதை - 'கண்ணி வடி' என மாற்றி, 'மாலை போலும் வடுக்களையுடைய மாம் பொழில்' எனப் பொழிலுக்கு அடையாக்குக. 'பொழில் சேர் வைகை' என்க. வைகையில் அமணரை மலைந்தவர் ஞானசம்பந்தர் 'பூம்பொழிலே புக்குச் சேர்ந்திருப்பார்' - என உரைக்க. இதற்கு 'அவர்கள்' என்னும் தோன்றா எழுவாய் வருவிக்க. எனவே, 'மீளுதலே நீர் செய்யத் தக்கது' என்பது குறிப்பெச்சம்.

1323. குறிப்புரை: இது பாடாண் திணைக் கைக்கிளைத் துறை. செவிலி கூற்று. குருந்து - குருத்து ஓலை. இதுவும் வெண்மை நிறம்

1. தொல் - சொல் - கிளவியாக்கம். "உருபென மொழியினும்"