கண்ணி - 20 கமுகுகளில் ஒருவகை கூந்தற் கமுகு; ‘கூந்தற் பனை’ என்பதுபோல. இளங் காவைக் கூறியபின், பெருமாச் சோலை சொல்லப்படுகின்றது. (கண்ணி - 21, 22) இதில் பாதிரி, (பாடலம்) சண்பகம், மாதவி, (குருந்து) புன்னை, குரா இம்மரங் களுடன் தாழையும் சொல்லப்பட்டது. கேதகை - தாழை. இது ‘கேதை’ என மருவிற்று. கெழீஇ - பொருந்தி. இவைகளைத் திணை மயக்கமாகக் கொள்க. போதின் - உரிய நேரத்தில். வார் பொழில் - நீண்ட சோலை; பெருமரச் சோலை. மாடு - பக்கம்.

கண்ணி - 23, 24 பல வகை ஒலி யெழுதல் கூறப்படுகின்றது. ஆலை - கரும்பாலை. அரிவார் - நெல் அரிபவர். ஆலும் - பறந்து அசைகின்ற. அறு பதங்கள் - ஆறு கால்களையுடைய வண்டுகள். ஆன்று - நிறைந்து. பொலிவு - விளக்கம். வேலை - கடல். “வேலை ஒலிப்ப” என்பது, ‘வேலை போல ஒலிப்ப’ என வினை யுவமத் தொகை. வெறி - நறுமணம்.

கண்ணி - 25 புற நகர்ச் சிறப்பு:- ‘நந்த வனம்’ என்பது நீட்டல் பெற்றது. நந்த வனம் - பூந்தோட்டம். நற்றவத் தோர் சார்வு இடம் - தபோ வனம். அந்தம் - முடிவு சீர். ஆர் அழகு - சிறப்பு நிறைந்த அழகு. (கண்ணி - 26) வார்தல் - நீளுதல். தன்மையஆ - (நந்த வனமும், தபோவனமும்) இத்தன்மையால் இருக்க. “பூதலத்துள் ஓங்கி” என்பதை, “திகழ” என்பதன் பின்னே கூட்டுக. கிடங்கு - அகழி.