வேறு

அணைவான் - அருகாக உள்ள. கனை கடல் - ஒலிக்கின்ற கடல். “அவை” பகுதிப் பொருள் விகுதி. படியாரும் நிகர் அரிய - இப்பூமியில் ஒருவரும் தன்னை நிகர்ப்பவர் இல்லாத, “வரி ஆரும் மதர் நயனி” என்னும் தொகைச் சொல் ஒரு சொல் நீர்மைத்தாய், ‘தலைவி’ எனப் பொருள் தந்து, “அரிய” என்னும் குறிப்புப் பெயர் எச்சத்திற்கு முடிபாயிற்று. வரி ஆரும் (நயனம்) - செவ்வரி படர்ந்த (கண்கள்). மதர் நயனம் - களிப்புத் தங்கிய பார்வையை உடைய கண்கள். நயனி - கண்களை உடையவள். ‘நயனிக்கு’ எனப் பொருட்டுப் பொருளதாகிய நான்கண் உருபு விரிக்க. ‘நுளையர் பெண்ணாயினும் உனது அருளையான் வேண்டுகின்றேன்’ என்பான், “நுளையர் மடமாது உன் அருள் பெறின் யான் எப் பணியையும் புரிவேன்” என்றான். இப்பாட்டு நெய்தல் திணையாதல் வெளிப்படை

1359.குறிப்புரை: “துறுபொழில் மதிற் புறவ முதுபதி மன்” என்பது முதலாகத் தொடங்கி யுரைக்க.

இப்பாட்டுத் திருஞானசம்பந்தரது திருப்பதிகங்கள் செய்த அற்புதங்களைத் தொகுத்துக் கூறுகின்றது. புவியுள் பெறு பயன்களை (பெற வேண்டிய பயன்களை) மிக அருளுவன. பிற்றை முறை - அவற்றிற்குப் பின், ‘ஒழித்து’ என்பது “ஒழிச்சு” என மருவி வந்தன. ‘ஒழிச்சுவிடுவன’ என்பதில் ‘விடு’ என்னும் துணிவுப் பொருள் விகுதி தொகுக்கப் பட்டது. பஃறி - ஓடம். உய்த்தன - செலுத்தின. ‘புன் சமண்’ என இயையும். “நறு மறு” என்பது வெகுளியை முழுதும் காட்டாது சிறிது புலப்படுத்து ஒலிக்குறிப்பு. குரை - குரைத்தல்; பேசுதலை, “குரைத்தல்” என்றது இகழ்ச்சி பற்றி. சமண் - சமணக் குழாம். துன் அரு விடம் - பொருந்துதற்கு அரிய நஞ்சு. துறு - நெருங்கிய. புறவம் - சீகாழித் தலம். ‘தொழில் பலமிகுத்த தமிழ்’ என இயைக்க.