பொருள் வயிற் பிரிவு

24.12 நெஞ்சொடு புலத்தல்

    நெஞ்சொடு புலத்தல் என்பது நெஞ்சொடு நொந்து கூறாநின்றவன், பேயிடத்துஞ்செய்தலரிதாம்பிரிவை இவளிடத்தே யெளிதாக்குவித்துச் சேய்த்தாகிய இவ்விடத்துப் போந்த நினது சிக்கனவு அஞ்சத்தக்கதெனப் பின்னும் அந்நெஞ்சொடு புலந்து கூறாநிற்றல். அதற்குச் செய்யுள்-

343. நாய்வயி னுள்ள குணமுமில்
        லேனைநற் றொண்டுகொண்ட
    தீவயின் மேனியன் சிற்றம்
        பலமன்ன சின்மொழியைப்
    பேய்வயி னும்மரி தாகும்
        பிரிவெளி தாக்குவித்துச்
    சேய்வயிற் போந்தநெஞ் சேயஞ்சத்
        தக்க துன் சிக்கனவே.

343

_________________________________________________

24.12.  அழற்கடத் தழுக்கமிக்கு
       நிழற்கதிர்வேலோன் நீடுவாடியது.

    இதன் பொருள்: நாய் வயின் உள்ள குணமும் இல்லேனை நல் தொண்டு கொண்ட - நாயினிடத்துள்ள நன்மையுமில்லாத வென்னை நல்ல தொண்டாகக்கொண்ட; தீவயின் மேனியன் சிற்றம்பலம் அன்னசில் மொழியை - தீயிடத்து நிறம்போலு நிறத்தை யுடையவனது சிற்றம்பலத்தையொக்குஞ் சிலவாகிய மொழியை யுடையாளிடத்து; பேய் வயினும் அரிதாகும் பிரிவு எளிதாக்குவித்து; பேயினிடத்துஞ் செய்தலரிதாம் பிரிவை எளிதாக்குவித்து-சேய் வயின் போந்த நெஞ்சே - சேய்த்தாகிய இவ்விடத்துப் போந்த நெஞ்சமே; உன் சிக்கனவு அஞ்சத்தக்கது - உனது திண்ணனவு அஞ்சத்தக்கது எ-று.

    நற்றொண்டென்புழி நன்மை: சாதியடை. சின்மொழியை யென்னு மிரண்டாவது ஏழாவதன்பொருட்கண் வந்தது.

343