:: TVU ::

154

	இனைய கற்பகப் பொதும்பரின் நடுவண தியைந்த நனைம லர்த்தட வாவியைச் சிந்தையுண் ணாடிற் கனைக டற்புவி முழுவதுங் கதிக்கரை யேறும் புனையும் வாசக மன்றிது புராதன சுருதி.	14

	ஆழி நாயகன் ஞானத்தி லருளிற்றூய் மையினில் வாழி யன்பினி லாழ்ந்துநீர் நிறைந்துநிர்ம் மலமாய்ப் பாழி யம்புவி யாத்துமப் பயிர்வளஞ் சுரப்ப ஊழி யூழிபாய்ந் துறுவது ஜீவநீ ருதகம்.	15

	ஜீவ னுக்குல வாவொரு நித்திய ஜீவன் நாவி னுக்கமு தச்சுவை நினைவிற்கு நறுந்தேன் தீவி னைக்கொரு மருந்துவண் சிறையளி முரல்பைங் காவி னுக்கணி யாயதிச் சீவநீர்க் கங்கை.	16

	புனித மாயது புண்ணியம் பொலிவது பாவத் துனித விர்ப்பது சுகிர்தத்தை விளைப்பது துய்க்கும் மனித ஜீவரை வானவ ராக்கிடும் வலத்த தினிதி னெங்கணுஞ் சுரப்பது நாடுவோ ரெவர்க்கும்.	17

	பாசம் வீசிய பான்மைய பளிங்கெனத் தெளிந்த தேசு லாமுழு மதிக்கதி ரொருவழித் திரண்டு மாசி லாமடு வெனப்பெயர் வதிந்தன வனைய ஆசில் வெண்மணற் குவால்பொரூஉ மலைபுரள் கரைய.	18

	ஜீவ மாநதி தீரத்தை யடுத்தலிற் செழிப்புற் றோவி லாதது சுரப்பதத் தூயநீ ரூற்றாம் ஆவி வேட்டுவந் தருந்துவோர்க் கான்மநோ யகலுந் தாவி னித்திய சாம்பிராஜ் ஜியம்வந்து சாரும்.	19

	வானி ழிந்துவந் திம்பரை மருவிய மதுரம் ஆன பானநீ ராகவிங் கமைந்ததெள் ளமுதம் ஞான போனக நராத்தும ஜீவசஞ் சீவி தீன ரக்ஷணை யருள்வதோர் செழுஞ்சுவைத் தீம்பால்.	20

	நிரும லாதிபன் றொன்றுதொட் டுலவவோர் நியமத் தரும வேலியிட் டுவப்புடன் றரணியிற் சமைத்த மரும லிந்தநந் தனவனம் வளம்பெற நாளுந் திரும லிந்தவிச் சீவபுஷ் கரிணிநீர் தேக்கும்.	21