(பொ - ரை) திருவருள் மிகுந்து செங்கோல் செலுத்தி
இப்பூச்சக்கரம் முழுவதையும் ஒரு குடைநிழற்கீழ்க் கொணர்ந்து
பிரியத்தோடு ரட்சித்தருளுகின்ற கடவுள் வேந்தன் தனது
வெற்றிக்குடையின்கீழ் வாழுகின்ற நிலைபெற்ற ஜீவகோடிகளுக்கெல்லாந்
தந்திருக்கின்ற பிரமாணம் பத்து ஆகும். அவற்றைத் தனித்தனியாக நான்
சொல்லுவேன், கேளுங்கள்.

 

நம்மையே வணங்கல் வேண்டும் நமக்கிணை யாக வேறோர் பொம்மையைப் புனைர்ந்து தாழ்ந்து போற்றிடா திருங்கள் வீணே நம்மது நாமஞ் செப்பி னாசமே வருந்தப் பாது செம்மைசே ரோய்வு நாளைச் சிந்தையாற் றூய்மை செய்மின். 17

     (பொ - ரை) நம்மையே வணங்கவேண்டும். நமக்கிணையாக
வேறோர் பொம்மையை உண்டாக்கி அதற்குமுன் பணிந்து அதைப்
போற்றவேண்டாம். நமது நாமத்தை வீணிலே வழங்கினால் தப்பாமல்
நாசமேவரும். சிறப்புப் பொருந்திய ஓய்வுநாளை மனதினால் பரிசுத்தமாய்
ஆசரியுங்கள்.

 

நலத்தொடு தந்தை தாயை நனியுப சரித்தல் நன்றாம் கொலைத்திறந் துரிச்சை நீசங் களவுபொய்க் கூற்றென் றாய புலைத்தொழில் புரிய லாகா புறத்தவன் பொருள்யா தொன்றை அலைத்தப கரிக்க வெண்ணு மாசையை யடர்த்தல் வேண்டும். 18

     (பொ - ரை) தந்தையையும் தாயையும் சகல நன்மைகளோடும்
நன்றாய் உபசரித்தல் தர்மம். கொலை, துர்இச்சை என்னும் இவை ஈனம்.
களவு, பொய் என்ற புலைத்தொழில்களைச் செய்யலாகாது.
புறத்தியானுடைய பொருள் யாதொன்றைவும் கைப்பற்றி அபகரிக்க
எண்ணும் ஆசையை நீக்கல்வேண்டும்.

என்றிவை சிலையிற் றீட்டி யெம்மனோர் கரத்து நல்கி நன்றுநீ ரடைய வேண்டி னயந்தனுட் டியுமிப் பத்தில் ஒன்றுமீ றிடினு மந்தோ வொருங்குதீச் சிறைக்குள் ளாவீர் இன்றுமீட் பென்றுசொன்னா ரிறையவன் யானுங் கேட்டேன். 19

     (பொ - ரை) என்ற இவற்றைக் கற்பலகையின்மேலெழுதி
எம்போல்வாருடைய கரத்திற்கொடுத்து நீங்கள் நன்மையை யடைய
விரும்பினால் இவற்றை விருப்பத்தோடு அநுஷ்டியுங்கள். இப்பத்துப்
பிரமாணத்துள் ஒன்றை மீறினாலும் நீங்கள் யாவரும் தீ நரகத்துக்கு
ஆளாவீர்கள். அதினின்று மீளுதல் இல்லை என்று கடவுள் சொன்னார்,
நானும் கேட்டேன்.

 

புவனமன் னுயிர்க ளிந்தப் பொதுவிதிப் பிரமா ணத்தை அவமதித் தொழுகுங் காலை யவரவ ரகத்து வாழுந் தவலரும் ஜீவ சாக்ஷி தடுப்பனத் தடையை மீறிற் குவலயா திபனுக் கெல்லாங் கூறிமுன் னிற்பன் மாதோ. 20