வெய்யவ னிறத்தலிற் பரிந்து மேதினித்
தையலாள் துக்கவெந் தழல்சு டச்சுட
மெய்யெலாங் கருதிய விதத்தை மானுமால்
வையக முழுவதும் புதைத்த மையிருள்.          

செஞ்சுட ரவிரொளிப் பிழம்பைத் தீக்குமோர்
நஞ்சிது வென்னவு நாச தேசத்துப்
பஞ்சபா தகத்திரள் படர்ந்த தென்னவும்
விஞ்சிய திருட்குழா மேலுங் கீழுமே.           

அஞ்சுட ரவித்துவந் தகிலம் யாவையும்
வஞ்சனை யுருக்கொடு கரந்து வௌவிய
அஞ்சனக் கருநிறத் தரக்கி யேகொலாம்
செஞ்செவாய் மடுத்துறச் செறிந்த காதிருள்.      

அலைகடற் புவியில்வா ழான்ம கோடிகள்
நிலைதபக் கொடுந்தொழி னினையும் பேய்க்கணத்
தலைமக னிடைக்கிடை வீசு தந்திர
வலையென விரவிருள் வளைந்த தெங்குமே.      

பள்ளநீ ருலகெலாம் படிந்த வெந்நிசி
நள்ளுந ராமென நடித்து நாடருள்
கள்ளமும் வஞ்சமுங் கரந்த கைதவர்
உள்ளமு நரகபா தலமு மொத்தவே.