ஐய மின்றற வோயுனக் காத்தும வாழ்வு
கைய தாயதெம் மாண்டகை கருணையி னழைப்பும்
வைய ரக்ஷகன் மலரடி யாட்கொண்ட மாண்புந்
துய்ய வாவிநல் காரருட் பெற்றியுந் துணியில்.        

மண்பி சைந்தருத் தாரஞர் மலிந்தபோ தத்துங்
கண்பி சைந்தழு சேய்க்குளங் கசியுமோர் தாயின்
பண்பி சைந்தநம் பரம்பரன் பத்தபா லனத்தை
நண்பி சைந்தினி தாற்றுமா றறிந்தன நல்லோய்.      

அரிய மித்திர விங்கிது நிற்கநின் னன்புக்
குரிய காதல மக்கண்மற் றுளர்கொலோ வுளரேற்
பிரிய விட்டுனைப் பிரிந்தவண் டரிப்பதென் பிரமை
தெரிய விள்ளுதி யென்றனள் சிநேகியாந் தெரிவை.   

வினவு வாசகங் கேட்டலும் விம்மிநெட் டுயிர்த்துக்
கனவு போன்றதெங் காமிய வாழ்வெனக் கருதி
வனவி ழித்துணை நீர்முத்த முகுத்திட மறைதேர்
பனவ னுள்ளுடைந் துருகிமற் றிவ்வுரை பகர்வான்.    

குணங்கு லாவிய குயிற்குரற் கோமள வல்லி
மணங்கு லாவிய மனைவியோ டீரிரு மைந்தர்
நிணங்கு லாமுடற் குயிரென வெனக்குளர் நிகழ்த்தில்
கணங்கு லாவிய கிளைஞரும் பலருண்டு கண்டாய்.    

புலைநி ரம்பிய நிருவிசா ரத்தொடு புணர்ந்த
அலைநி ரம்பிய கடற்புவி முழுவது மவிக்கும்
உரைநி ரம்பிய கனலின்வா னுகுதழ லென்னாக்
கலைநி ரம்பிய கட்டுரை தெரித்தனென் கவன்று.     

உலக வாழ்க்கையை யுறவினை யூர்ப்பழக் கத்தை
அலகை மார்க்கத்தை யழல்விட வரவென வஞ்சி
விலகி யென்னொடுந் திருமியிம் மெய்வழி பிடித்தற்
கிலகு நன்மதி படைத்தில ளென்மனைக் கிழத்தி.     

மறுவி லாமதி முகத்தினாய் மைந்தரோர் நால்வர்
சிறுவர் சொன்மதி தெருண்டிடார் நன்மையிற் றிறம்பி
உறுவ தாயசிற் றின்பவுல் லாசமே யுவப்பர்
நறுவி தெள்ளிவெங் கடுத்தழை நயக்குமாப் போலும்.