(பொ - ரை) 'எல்லாம் வல்ல கடவுளாகிய திரித்துவ மூர்த்திகளுள்
நான் ஒருவன். (பிதாவும் நானும் பரிசுத்த ஆவியாராகிய) மூவரும் ஒன்றாக
உள்ள வித்தியாசமற்ற தன்மையை நீங்கள் யாவரும் நம்பி என்னைவிட்டு
விலகாதிருப்பீராயின் என்னில் தரித்திருப்பீர்.'

 

தொள்ளை மாநில மெங்குந்து ருவிநீர் விள்ளு மின்சுவி சேஷத்தின் மெய்ம்மையைக் கொள்ளு மாலுல கம்பகை கொள்ளினும் வள்ள லாரருள் வாய்க்கும லங்கலீர்.         15

     (பொ - ரை) 'பழமையான இப்பெரிய உலக முழுவதும் நீங்கள்
சுற்றித் திரிந்து சுவிசேஷ சத்தியத்தைப் பிரசங்கியுங்கள். உலகம்
அதனை யேற்றுக்கொள்ளும். அங்ஙனமின்றி உங்களைப் பகைத்தாலும்
பயப்படாதீர்கள், கடவுளது அருள் உங்களுக்குக் கிடைக்கும்.'

 

சொற்ற வென்னுரை யுட்கொடு தூநெறி பற்றி மெய்ம்மைப கர்ந்திடு சான்றிராய் நிற்றி ரென்னிலந் நின்மல வீட்டைந் துற்றெ னோடரு காசனத் தோங்குவீர்.       16

     (பொ - ரை) 'நான் சொன்ன வார்த்தைகளை நீங்கள் மனதில்
கொண்டு சன்மாாக்க நெறியையடைந்து, சத்தியத்தைச் சொல்லும்
சாட்சியாக நீங்கள் நிலைபெறுவீர்களானால், பரிசுத்தமான அந்த பரம
வீட்டையடைந்து என் ஆசனத்தின் பக்கத்தில் வந்துசேர்ந்து என்னுடன்
விளங்குவீர்.'

 

எண்ட ரும்பர லோகவி ராஜ்ஜியத் துண்டு பற்பல தானமங் குற்றியான் ஒண்ட லந்தெரிந் தும்பொருட் டன்பினீர் கண்டு மீள்குவ னெஞ்சங்க லங்கன்மின்.      17

     (பொ - ரை) 'அன்பர்காள்! மாட்சிமை தங்கிய வானுலகத்தில்
அநேக இடங்கள் உண்டு. நான் அங்கே போய் சிறந்த இடத்தை
உங்களுக்காக ஆய்த்தம் செய்துவிட்டுத் திரும்ப வருவேன்,
மனங்கலங்காதீர்.'