(பொ - ரை) அங்கே இவ்வாறு சொல்லக்கேட்ட மெய்
அடியாராகிய சீஷர் தம்மில் யார் இத்தீங்கை நினைத்திருக்கிறான்
என்று அறியக்கூடாதவர்களாய், தாங்க முடியாத வருத்தமும் பயமும்
தங்களில் அதிகரிக்க, ஒருவரையொருவர் தனித்தனியாக விசாரித்தார்கள்.

 

ஈண்டுறுந் துரோகியா ரெனக்கொ திப்புடன் ஆண்டகை மடியரு கணைந்த வன்பனைத் தூண்டினன் பேதுரு சமிக்கை தோன்றுற வேண்டின னவனுமயார் விள்ளு கென்னவே.     27

     (பொ - ரை) பேதுரு என்னும் சீஷன், 'இங்குள்ளவர்களில்
அப்பேர்ப்பட்ட துரோகி யார்?' என்று நம்பெருமானது மார்பில் சாய்ந்து
கொண்டிருந்த அன்புள்ள சீஷனாகிய யோவானை மனவருத்தத்துடன்
சைகைகாட்டி கேட்டான். அது கண்ட யோவானும் 'அவன் யார்
சொல்லும்' என நம்பெருமானை வேண்டினான்.

 

அன்பருக் காரமு தனைய வஞ்சொலார் இன்புறுந் துணிக்கையொன் றெடுத்துத் தங்கையால் வன்புறு மனத்தனுக் களித்து மற்றவன் என்பதை நண்பனுக் கிகைத்துப் பின்னரும்.    28

     (பொ - ரை) பக்தர்கட்குச் சிறந்த அமுதத்திற்கொப்பான
அழகிய வார்த்தைகளைப் பேசும் நம்பெருமான் (உண்போருக்கு)
இனிமையைத் தரக்கூடிய அப்பத்துண்டு ஒன்றைத் தம் கையால் எடுத்து,
கடினமான மனதையுடைய ஸ்காரியோத்து என்பவனுக்குக் கொடுத்து
(தன்னைக் காட்டுபவன்) அவன்தான் என்பதை அன்புள்ள சீஷனாகிய
யோவானுக்குச் சொல்லி மறுபடியும்,

 

என்னொடுங் கலத்திற்கை யிடுகின் றோனெவன் அன்னவ னேயெனை யளிப்பன் றெவ்வர்க்கு முன்னவை மொழிந்தவா றெனக்கு மூள்வன பின்னவற் குறுதுயர் பேசற் பாலதோ.         29

     (பொ - ரை) 'என்னுடன் பாத்திரத்தில் கையிடுகிறவனாகிய
அவனே என்னைப் பகைவரிடம் ஒப்புவிப்பான். ஆதிகாலத்தில்
என்னைப்பற்றி சொல்லியிருக்கிறவண்ணம் எனக்கு சம்பவிக்கும்.
இதற்குப்பின் அவனுக்கு வரும் துன்பம் நாம் பேசுந்தன்மையுடையதோ?'

 

பிறந்திடா திருப்பனேற் பெரிய நன்மையென் றறைந்தனர் பேதுரு வாதி யன்பர்க்கு மறைந்துபுட் சிமிழ்க்கும்வேட் டுவனில் வஞ்சகம் நிறைந்தவன் மற்றிவை நிகழுங் காலையில்.      30