(பொ - ரை) பக்கத்தில் அக்கினியானது
நெருங்கிக்கொண்டிருக்கும் போதும் தூங்குகின்ற மலைப்பாம்பு
தன்னிலையை யுணராதிருத்தல்போல, நம்மைச் சமீபித்துக்கொண்டிருக்கின்ற
பரம ராஜனுடைய கோபாக்கினியினால் நமது நாடாகிய நாசதேசம் வெந்து
ஒழியப்போகின்ற காலம் வந்துவிட்டதை உணராதவர்களாகி, அழியும்
தன்மைத்தாகிய சரீரபோகமொன்றையே விரும்பி நம் வாணாளை
வீணாளாகக் கழித்தல் நல்லதோ?

 

நந்துநான் யாரே னிங்கு நாடினே னலமே நல்கி இந்தமட் டெனைப்பு ரந்தாற் கென்கடன் யாவென் செய்தேன் வந்திடுங் கதியென் னென்று மாவிசா ரஞ்செய் யாது சிந்தையற் றுழலு மாந்தர் ஜென்மமும் ஜென்ம மாமோ. 29

     (பொ - ரை) விரும்புகின்ற நான் யார். ஏன் இங்கு நாடிவந்தேன்
இதுவரையுமெனக்கு நன்மையே யீந்து என்னை இரட்சித்தவருக்கென்
கடமைகள் யாவை? நான் என்ன செய்தேன்? எனக்கு வரக்கூடிய கதி
என்னவென்று பெரிய விசாரங்கொள்ளாமல் இவற்றைக்குறித்து யாதொரு
சிந்தனையுமின்றித் திரியும் மாந்தருடைய ஜென்மமும் ஜென்மமாமோ?

 

காட்சியாற் கருத்தாற் காணுங் காசினிப் பொருள்கள் யார தாட்சிமற் றவர்க்குச் சொந்த மாயகா ரணமே தம்மான் மாட்சிசால் குணமெவ் வாறு வந்திடுங் கதியென் னென்று சூழ்ச்சியற றிருக்கு மாந்தர் சுமையன்றோ நிலத்துக் கம்மா. 30

     (பொ - ரை) காட்சியாலும் கருத்தாலும் நாம் காண்கின்ற காசினிப்
பொருள்கள் யாருடைய ஆட்சிக்குட்பட்டவை? மற்றவர்களுக்கு இவை
சொந்தமான காரணம் யாது? ஆண்டவருடைய மாட்சிமைபொருந்திய
குணங்கள் எப்படிப்பட்டவை? வரப்போகுங் கதியென்ன? என்னும்
ஆராய்ச்சியில்லாதிருக்கும் மனிதர் பூமிக்குப் பாரமன்றோ?

 

தன்னைத்தன் னிலையை மேலாந் தலைவனை யவன்சித் தத்தை முன்னைத்தா னறிந்து பின்னர் முறையறிந் தொழுகல் வேண்டும் பின்னைத்தா னறிது மென்றல் பெரும்பிழை பெரிது மோசம் என்னத்தான் கவலு கின்றேன் யாதுநீர் கவலு கில்லீர். 31

     (பொ - ரை) தன்னையும் தன்னிலையையும் எல்லாவற்றிற்கு
மேலாகிய தலைவனையும் அவன் சித்தத்தையும் முன்னாக அறிந்து
பின்னாக நடக்கவேண்டிய முறைமையையும் உணர்ந்து ஒழுகவேண்டும்.
பின்பு பார்த்துக்கொள்ளுவோமென்றால் பெரும்பிழையும் பெரும் மோசமும்
ஆகும் என்று நான் கவலைப்படுகின்றேன். நீங்களோ
கவலைகொள்ளுகின்றீர்களில்லை, யாது காரணம்?

 

வித்தக வரசன் றந்த விளம்பரத் தொனிகேட் டின்னும் இத்தலத் திருந்து நாச மெய்துத லினிதன் றென்று சுத்தசத் தியமு மக்குச் சொல்லிவற் புறுத்து மென்னைப் பித்தனென் றிகழ்கின் றீர்நும் பேதைமை பெரிது மாதோ. 32