(பொ - ரை) மோசம் வருமுன்னர் தங்களைக்
காத்துக்கொள்ளாதவருக்கு அவரது வாழ்க்கை எவ்வளவினவாயினும்
நெருப்புப்பட்ட வைக்கோல் துரும்புபோல் கெடும் என்று சொல்லுவார்.
துன்பம் வந்து வருத்து முன்னர் அதற்கு விலகியோடி அடைக்கல
ஸ்தானமாகிய பரமராஜனது சந்நிதானத்தையடைந்தால் நித்திய ஜீவனைப்
பெறுதல் நிச்சயம்.

 

ஈண்டுநா னுரைத்த மாற்றம் யாவுமிப் புத்த கத்த தாண்டகை யருளி னாலே யடுத்ததென் கரத்து முன்னம் காண்டகு மிதனை நீவிர் கருத்துற வரசித் துய்மின் வேண்டுமேற் றருவல் ராஜ விளம்பரம் வெறுத் திடாதீர். 37

     (பொ - ரை) இப்பொழுது நான் உரைத்தவை யாவும் இப்புதத்தில்
உள்ளன. இது தேவ கடாட்சத்தினாலே என் கையில்வந்து சேர்ந்தது.
முதலாவதாகக் காணத்தக்க இதனை நீங்கள் மனதில் பதியத்தக்கதாக
வாசித்து உய்யுங்கள். உங்களுக்கு விருப்பமானால் தருவேன். ராஜ
விளம்பரத்தை வெறுத்திடாதேயுங்கள்.

 

ஆவது கருது வீரே லரைக்கண முந்தா ழாது தீவா விருந்த நாச தேசத்தை யொருவி யின்னே ஜீவனே யென்று கூவித் தீவிரித் தோடல் வேண்டும் சாவது துணிந் தீராயிற் றங்குமித் தேயத் தென்றான். 38

     (பொ - ரை) நடக்கவேண்டுவதை ஆலோசிப்பீராயின்
அரைக்ஷணமும் தாமதியாமல் தேவகோபாக்கினிக்கு இடமாகிய
நாசதேசத்தைவிட்டு நீங்கி இப்பொழுதே ஜீவனே என்று கூவிக்கொண்டு
தீவிரமாக ஒடல் வேண்டும். சாவதற்குத் துணிந்தீராயின் இத்தேசத்தில்
தங்கும் என்றான்.

 

இந்தவா றுரைத்த வெல்லா மிருஞ்சிலை மீது தாக்கும் பந்தென லாய தன்றிப் பாமரர் பழுது மல்குஞ் சிந்தையு ணிலையா தாகச் சினந்தவ மதிக்க லுற்றார் பந்தமே கொளுத்தி னாலும் பயனுண்டேர குருடர்க் கம்மா. 39

     (பொ - ரை) இவ்விதமாக இவனுரைத்தவை யெல்லாம் பெரிய
கல்லின்மேல் அடிக்கப்பட்ட பந்தைப்போல் ஆனதேயல்லாமல் அந்தப்
பாமர ஜனங்களுடைய குற்றம்நிறைந்த சிந்தையுள் நிலைகொள்ளாதனவாக
அவர்கள் கோபங்கொண்டு அவனை அவமதித்தனர், பந்தத்தைக்
கொளுத்தினாலும் குருடருக்கு அதினால் பயனுண்டோ?

 

என்னைப்போற் பரம ஞானி யில்லையென் றெமை யிகழ்ந்த உன்னைப்போற் பித்த னிந்த வுலகத்தி லில்லை யென்பார் பொன்னைத்தான் மாத ரைத்தான் பூவைத்தான் புறக்க ணித்தாற் பின்னைத்தா னெய்து மின்பம் பிறிதுண்டோ பேசு கென்பார். 40