(பொ - ரை) இவனுடைய மனைவி தன் இருகண்களினின்றும்
நீர்த்தாரை வடிய கணவனுக்கு புத்திமாறாட்டம் வந்துவிட்டது, இனி
நான் என்ன செய்வேன் என்று கவலைகொண்டு மனம் வருந்தினாள்.
நுண்ணிய அறிவையுடைய பெரியவர்களின் நூலோடு பழகித்
தெளிவடையாத பெண்ணறிவென்பதெல்லாம் பேதைமை யுடையதல்லவோ?

 

பொற்றொடி யினையு மாறும் புறக்கணித் தகந்தை பேசி உற்றவ ரிகழ்ந்த வாறு முணர்ந்தவாத் துமவி சாரி எற்றிவர் தன்மை யந்தோ வென்னினிச் செய்வ லென்று சற்றுநின் றேகாந் தத்திற் றம்பிரான் திருமுன் கிட்டி. 45

     (பொ - ரை) பொற்றொடியினளாகிய அவன் மனைவி வருந்திய
விதத்தையும் உற்றவர் புறக்கணித்து அகந்தைபேசி இகழ்ந்த விதத்தையும்
உணர்ந்த ஆத்தும விசாரியானவன் ஐயோ! இவர்களுடைய தன்மை
எப்படிப்பட்டது? இனி நான் என்னசெய்வேன் என்று சற்று நின்று தனித்த
ஒரிடத்தில் சர்வேஸ்வரனுடைய சந்நிதானத்தையடைந்து,

 

சருவலோ கத்தை யாளுந் தயாபரா தமியேற் சூழ்ந்த நிருவிசா ரிகள்சன் மார்க்க நெறியறி யாது செய்யும் பொருவரும் பிழைக ளெல்லாம் பொறுத்தருள் புரியுந் தூய திருவுள மிரங்கி யென்று ஜெபித்தனன் சிந்தை யொன்றி. 46

     (பொ - ரை) சர்வலோகத்தையும ஆளும் தயாபரா! அடியேனைச்
சூழ்ந்திருக்கின்ற நிர்விசாரிகளாகிய இவர்கள் சன்மார்க்க நெறியை
யறியாமற் செய்கின்ற ஒப்பற்ற பிழைகளையெல்லாம் பரிசுத்த
திருவுளமிரங்கி மன்னித்து அவர்களுக்கு அருள்புரியுமென்று மனமும்
வாக்கும் ஒத்து ஜெபித்தனன்.

 

அறங்கிளர் பாலோ கத்துக் கரசனைப் பரவிப் போந்து புறங்கிளர் வெளியு லாவிப் புத்தகச் சுருளை நாடி இறங்கிய முகத்த னாகி யென்செய்கே னிரக்ஷைக் கென்று கறங்கெனச் சுழலு நெஞ்சன் கவன்றனன் கலக்க முற்றான். 47

     (பொ - ரை) தர்மமானது பிரகாசிக்கின்ற பரலோக இராசனைத்
தோத்திரித்து அவ்விடம்விட்டு நீங்கிப் பக்கத்திலுள்ள
வெளியிடத்திலுலாவி, புத்தகக்சுருளை நாடி, இறங்கிய
முகத்தையுடையவனாகி இரட்சிப்புக்கு யான் என்ன செய்வேன் என்று
காற்றாடிபோற் சுழலுகின்ற நெஞ்சனாய்க் கவலைகொண்டு,
கலக்கமுற்றனன்.

 

தேசநா சத்தை யெண்ணித் திகிற்படும் பிணிந்து நின்ற பாசவெவ் வினையின் மிக்க பாரந்தா லழுந்தும் யாரே நீசனே னுய்யு மாறு நெறிதெரித் திடுவ ரென்னும் மாசறு முயிரைக் கூவி வாய்திறந் தரற்று மாதோ. 48

     (பொ - ரை) நாசதேசத்தை நினைத்துத் திகில்கொள்ளுவான்.
தன்னைக் கட்டி நிற்கின்ற பாசமாகிய கொடியவினையினது மிகுந்த
பாரத்தால் அழுந்துவான். நீசனாகிய நான் உய்யும்வழி யாரே
தெரிவித்திடுவர் என்பான். குற்றமற்ற ஜீவனை வாய்திறந்து கூவி
வருந்துவான்.

                          மெய்யுணர்ச்சிப்படலம் முற்றிற்று
                         _____________________________