(பொ - ரை) வனையப்பெற்ற பொன்னாலாகிய வீரக்கழலை
யுடையவனே! இத்தகைய சிந்தனைகள் எனது ஹிருதயத்துள்
ஊன்றியிருத்தலால் வருந்துகின்றேன் என்று ஆத்துமவிசாரி சொல்ல,
அவற்றையறிந்து புறத்தியாருடைய நன்மையையே எப்பொழுதும்
நினைக்கின்ற சுவிசேஷகனும் கீழ்வருமாறு கூறுவான்.

 

நன்றுநன் றுன்னிலை நாச தேசத்து நின்றுநின் றித்துணை தாழ்த்த னீதியோ பொன்றிடர் வருமுனம் புகலி டம்பெறச் சென்றிடா திவணுழல் சிந்தை யென்னென்றான். 13

     (பொ - ரை) உனது நிலைமை மெத்த நன்றாயிருக்கின்றது! நீ
நாச தேசத்தில் இவ்வளவு தாமதித்து நிற்றல் நீதியோ? கொல்லத்தக்க
துன்பம் வருமுன்னே அடைக்கல ஸ்தானத்தைத் தேடிச் சென்றிடாமல்
இவ்விடத்தில் சுற்றித் திரிகிற சிந்தை என்ன என்றான்.

 

உய்வழி யிதுவிதென் றுழறும் பல்வழி பொய்வழி யவ்வழி போகு வேனலன் தெய்வநா யகன்திரு நகர்க்குச் செல்வழி எவ்வழி யவ்வழி யின்னுந் தேர்கிலேன். 14

     (பொ - ரை) இரட்சிப்பின்மார்க்கம் இது இது என்று புவியோர்
உளருகின்ற பல வழிகள் பொய் வழிகள். அவ்வழிகளில் நான்
செல்லமாட்டேன். தெய்வநாயகன் திருநகர்க்குச் செல்லுகின்ற வழி
எவ்வழி? அவ்வழி எது என இன்னும் நான் அறியேன்.

 

ஆதியான் றிருநக ரடுக்குஞ் ஜீவநற் பாதைநீ யறிதியேற் பகர்தி யாலென வேதியர் குரவனை வினவி னானவன் ஓதுவல் கேட்டியென் றுரைத்தன் மேயினான். 15

     (பொ - ரை) ஆதியான் திருநகர்க்குச் செல்லும் ஜீவபாதையை நீ
யறிந்தாயானால் அதையெனக்குச் சொல்லென, வேதியர் குருவாகிய
சுவிசேஷகனை வினாவினான். அதற்கு அவனும் 'நான் சொல்லுகிறேன்
கேள்' என்று சொல்ல ஆரம்பித்தான்.

                            குருதரிசனப் படலம் முற்றிற்று.
                               ______________________