:: TVU ::

291

	சஞ்சல மலையைத் தாண்டிவந் திப்பாற் சாரலிற் றாழ்மையென் றொருபேர் விஞ்சிய பள்ளத் தாக்கினை யெதிர்ந்தான் மேதகு கிறிஸ்தவ னெவர்க்குஞ் செஞ்செவே நெடுநாட் பல்பெருந் துன்ப நுகர்ந்துபின் சிந்தனை திருந்தி வஞ்சமில் தாழ்மை வரப்பெறு மிதுவே வாரிசூழ் வையகத் தியற்கை	4

	வேறு
	சீரிய தாழ்மையென் றுரைக்குஞ் செவ்விய பேரியற் படுகரின் பெற்றி நோக்குறின் ஆரிய ராயமெய் யறிஞ ரேயலாற் பூரியர் யாவரும் புகப்பெ றாதது.	5

	அண்ணலார் கருணையாற் றணிகொ டீரத்துத் தண்ணளி நறுநிழல் படர்ந்த சார்பது புண்ணியப் போனக மமைந்த பொற்பது நண்ணரு மிகபர நலம்ப யப்பது.	6

	கன்மனத் தூறுநீர்க் கான்சு னைத்தது பொன்முக மரைமலர் பொலியும் பொற்பது நன்மொழி நறைகமழ் நந்த னத்தது தன்மமாக் கனிதருந் தருக்கள் சான்றது.	7

	கோதறு குணவளங் குலவு மாயினும் மாதரை மானிடம் வரையத் தக்கது மேதகு நற்பயன் விளைக்கு மாயினுஞ் சாதக மாவதற் கருமை சான்றது.	8

	இத்தகு வழிப்படு மெம்ம னோர்க்கெலாஞ் சத்துரு பயங்கரந் தவிர்க்குங் கோட்பது வித்தக கிறிஸ்துவின் விமலச் சேவடி உத்தம சுவடுநன் கொளிரப் பெற்றது.	9

	வலமிட மறிகிலா வச்சை மானிடம் நலமிலா திகழ்புகழ் நாடு கில்லது குலநறுங் குணமலர் குழுமி யெண்டிசைப் புலமெலாம் பரிமளம் பொலியும் பொற்பது.	10