(பொ - ரை) பிதா குமாரன் பரிசுத்தாவி என்னுந் திரித்துவமாகிய
முத்தலைச் சிகரியிலிருந்து உற்பத்தியான இந்த ஜீவகங்கையானது
வைதிகமாகிய குற்றமற்ற ஞானவுணவை விளைவித்து, உலகத்தவருக்கு
அதை ஊட்டி, பித்தளை உலகத்தைத் தூய்மை விளங்குகின்ற
பொன்னுலகமாக்கி உத்தமம் விளங்குகின்ற செம்மையான ஒழுக்கத்தை
இக்காலத்திலும் எக்காலத்திலும் உடையது.

 

ஒருநெறித் தாகித் தூய்தா யுள்ளுறத் தெளிந்து பாவத் தரவன முறித்துச் சாடித் தருமச்செஞ் சாலி நீடப் பெருவளம் படுத்து நித்ய பேரின்ப ஜலதி கூடும் திருவுடைத் தாத லாலித் தீர்த்திகை சுருதி போலும். 5

     (பொ - ரை) ஒரே வழியையுடையதாய், தூய்மையானதாய், உள்ளும்
புறம்பும் தெளிவானதாய், பாவமாகிய விருக்ஷங்களை முறித்துத் தள்ளி,
தருமமாகிய சிறந்த நெற்பயிர் ஓங்க பெரிய வளத்தையுண்டாக்கிப்
பேரின்பமாகிய சாகரத்திற் செல்லும் நலத்தை யுடைத்தாயிருத்தலால்
இந்நதியானது வேதத்திற்கு ஒப்பாகும்.

 

தண்ணளி மருவி யான்ம தாரகத் துருவம் வாய்ந்து விண்ணிழி புதுமை காட்டி விதிவரம் பொழுக்கம் பூண்டு கண்ணகன் ஞால முய்யக் கனிந்துயி ரளித்துக் காத்துப் புண்ணியன் கிருபை யேயாய்ப் பொலிந்தது ஜீவ வாரி. 6

     (பொ - ரை) குளிர்ந்த கிருபைபொருந்தி, ஆத்மமாவுக்கு
ஆதாரமாகிய உருவம் வாய்க்கப்பெற்று, பரலோகத்தினின்று இறங்கின
புதுமையைக் காட்டி, விதிவிலக்குளாகிய ஒழுக்கங்களுக்கு உட்பட்டு,
அகன்ற இடத்தையுடைய இப்பூவுலகமானது இரட்சிப்படையும் வண்ணம்
இரங்கி ஜீவனைக் கொடுத்துக் காப்பாற்றி, புண்ணிய மூர்த்தியின்
கிருபையைப்போல் விளங்கினது இந்த ஜீவநதி.

 

மானிட ஜீவ தோட மலினத்தைக் கழுவித் தூய போனக மாகித் தாகம் போக்குபா னமுமா யென்றும் ஞானஜீ வனைவ ளர்த்து நற்கதிப் பயன்றந் துய்க்கும் மாநுவேல் குருதி போலும் மானத ஜீவ கங்கை. 7

     (பொ - ரை) மானிடருடைய ஜீவதோஷமாகிய அழுக்கைக்
கழுவி, தானே தூய்மையான சாப்பாடாகி, தாகம்போக்கும் பானமுமாகி,
எப்போதும் ஞானஜீவனை வளர்த்து, நற்கதியாகிய பயனைத் தந்து,
இம்மானுவேலுடைய குருதியைப்போல இரட்சிக்கும் இந்த ஞான
ஜீவகங்கை.

 

வீற்றுவீற் றாகிச் சென்றை வகைநில வேறு பாட்டை மாற்றிநன் மருத வைப்பா வளம்படுத் தறத்தை யோம்பி ஏற்றமுந் தாழ்வு மின்றா யெங்குமோர் சமமா யீண்டும் ஆற்றல்சால் கடவுள் வேந்த னாணையைப் பொருவும் வாரி. 8