(பொ - ரை) பரலோக இராசன் ஆஞ்ஞாபிக்கின்ற
திருப்பணிவிடைகளையே தம்தொழிலாகக் கொண்டு அவற்றை
நிறைவேற்றி வாழுகின்ற கெடுதலில்லாத ஆவிகளுக்குரியனவாய்,
உயர்ந்த வானலோகமானது ஏழு என்று வகுத்துக் காட்டுவனவாய்
உள்ள மேனிலைக் கோபுரங்கள் விதம்விதமான கோடிக்கணக்கானவை.

 

சொல்லரு முத்திமா நகருஞ் சூழ்ந்துள எல்லையும் வான்சுட ரியங்கு கிற்கில மல்லல்கூர் தம்பிரான் மகிமை யின்சுடர் புல்லிநின் றவிரொளிப் பிரபை போர்க்குமால். 48

     (பொ - ரை) சொல்லுதற்கரிய முத்திமா நகரத்திலும் அதைச்
சூழ்ந்துள்ள எல்லைகளிலும் வானஜோதிகள் இயங்குவதில்லை. ஏனெனில்
வல்லமைபொருந்திய தம்பிரானுடைய மகிமையின் சுடர் அவ்விடங்களில்
பொருந்தி நிலைபெற்று நின்று பிரகாசிக்கின்ற தனது ஒளியினால்
அவற்றைப் போர்க்கும்.

 

ஜீவமா ளிகைத்திரு முன்றிற் றேங்கிய ஜீவநீர் நிலைபெருக் கெடுத்துத் திவ்விய ஜீவமா நகரத்தைச் செழிப்பித் தூடுரீஇ ஜீவகோ டிகளுய ஜெகத்திற் பல்குமால். 49

     (பொ - ரை) ஜீவமாளிகையின் திருவாசலில் தேங்கிய
ஜீவநீர்நிலையானது பிரவாகங்கொண்டு திவ்யமயமாகிய ஜீவமாநகரத்தைச்
செழிப்பித்து, அதை ஊடுருவிச்சென்று, ஜீவகோடிகள் உய்யுமாறு
இவ்வுலகத்தில் பெருகும்.

 

ஜீவபுஷ் கரிணியின் றீரத் தோங்கிய ஜீவகற் பகமெனுந் தெய்வ மாத்தரு ஜீவநா யகனருள் பழுத்த செவ்வியில் ஜீவமாக் கனித்திரள் செறிந்து மல்குமே. 50

     (பொ - ரை) ஜீவபுஷ்கரிணியின் தீரத்தில் ஓங்கி
வளர்ந்திருக்கின்ற ஜீவ கற்பகமென்கின்ற தெய்வீகத் தன்மையையுடைய
பெரிய விருட்சமானது ஜீவநாயகனாகிய எம்பெருமானது திருவருள்
பழுத்தல்போன்று ஜீவ கனித்திரள்கள் நெருங்கி ஏராளமாய்ப் பெருகி
இருக்கும்.