பெருமானுடைய சிறப்பைக் கவிகளில் புனைந்து உரைக்கின்ற சப்தமும்,
முறுக்காணிகளையுடைய யாழ் வாத்தியத்தின் சப்தமும்
வானலோகமெங்கும் மிகுந்து சப்திக்கும்.

நன்மைசால் திருநகர் நந்த னத்தலர் தன்மமுங் கருணையுந் தயையன் பரதிசற் கன்மமு நறுங்கடி கமழ்ந்து லப்புறாப் பொன்மலர்க் குவைகளாப் பொதுளு மெங்கணும். 55

     (பொ - ரை) நன்மைநிறைந்த திருநகரத்திலுள்ள நந்தவனத்தில்
புஷ்பிக்கின்ற தருமமும் கருணையும் தயை அன்பு முதலிய
சற்கருமங்களும் இனிய வாசனை கமழ்ந்து கெடுதலில்லாத
பொன்மலர்க்குவியல்களாய் எவ்விடத்தும் நெருங்கியிருக்கும்.

சிறையுடைத் தூர்தஞ் சேனை யின்குழாம் முறைமுறை யகிலத்து முடுகி முத்திநாட் டிறைதிரு வுளக்குறிப் பினிதி னுய்த்தது குறைவற முடித்துமீண் டடுப்பர் கோனகர். 56

     (பொ - ரை) சிறகுகளையுடைய தூதர் சேனையின் கூட்டமானது
முறைமுறையாக பூவுலகத்திற்கு விரைந்துசென்று முத்திநாட்டிறைவனது
திருவுளக்குறிப்பை ஆங்கு கற்பித்து அதைக் குறைவில்லாமல் முடித்து
திரும்பவும் முக்திநகரையடையவர்.

தேவவுத் தரங்கொடு திகந்தத் தேகுவர் மூவுல கங்களு மிமைப்பின் முந்துவர் தாவிவிண் படர்குவர் சமுகத் தெய்துவர் வேவறி சதுரராம் விபுத வொற்றரே. 57

     (பொ - ரை) வேவு அறிதலிற் சாமர்த்தியரான தேவதூதர்கள்
ஈஸ்வரனுடைய ஆஞ்ஞைகளைக்கொண்டு அஷ்டதிக்குகளின்
எல்லைவரைக்கும் செல்வர். மூன்றுலகங்களையும் ஒரு கண்ணிமைப்
பொழுதினுள்ளே கடந்து செல்லுவர். ஆகாய மார்க்கமாகப் பறந்துசென்று
மீட்டும் ஈஸ்வரனுடைய திருமுன்னிலையை அடைவர்.

கல்லிமூ வுலகையுங் கழங்கென் றாட்டவும் ஒல்லைவான் சுடர்களை யூதி யோட்டவும் வல்லவான் சேனைகள் வரம்பில் கோடிகள் தொல்லையங் ககனமா ளிகைதொக் குள்ளன. 58

     (பொ - ரை) மூன்றுலகங்களையும் கையாற்கிள்ளியெடுத்துப்
பந்தைப் போல் ஆட்டவும், வான ஜோதிகளை அதிசீக்கிரத்தில் ஊதி
ஒட்டவும் வல்ல அளவில்லாத கோடிக்கணக்கான தேவசேனைகளுக்குரிய
பழைமையாகிய வானலோக மாளிகைகள் தொகுதி தொகுதியாயுள்ளன.