சேற்றிற் றாமரை முளைத்தெனச் சிப்பியி னின்று
தோற்று வெண்டா ளம்மெனத் தொடுநிலக் கரியில்
ஆற்றல் சாலொளி வைரம்வந் தெனவுவ ரளற்றில்
ஊற்றின் னீர்சுரந் தெனவவட் டோன்றின ருரவோர்.

மூன்றொன் றாகிய முதலர சாட்சியின் முறையை
ஆன்ற வுண்மையைத் தருமத்தை யவனிக்கு விளக்கிச்
சான்று ரைத்துவா னகர்வழி சமைத்திட ஜகத்தில்
தோன்றிற் றாலொரு திருச்சபை துலங்குவெண் பிறைபோல்.

ஆலம் வித்தினி லங்குரித் தறுகில்வே ரூன்றிக்
கோலி யெங்கணுந் தண்ணிழல் கொளுவிவிண் குலவிச்
சால வெவ்விடாய் தணித்துமேன் மேலுறத் தழைத்து
வேலை ஞாலத்தைப் போர்த்தது திருச்சபை விருக்கம்.

இருள றுத்தொளி பரப்பியுள் ளகம்புற மெங்கும்
பொருள்வி ளக்கிமோ சம்புகா வகைபுறங் காத்து
மருள கற்றிநூல் வழிதெரித் தென்றும்வா டாது
தெருள ளித்தொளி கிளைத்தது திருச்சபைத் தீபம்.

சத்தி யந்திக ழித்தகு திருச்சபைத் தலைவர்
நித்தி யானந்த ராஜ்ஜிய நிருமல வரசன்
புத்தி ரோத்தம புண்ணியர் புநருல கத்து
மத்தி யஸ்தராய் நடுப்புரி மானுவே லாமால்.

பாவ மல்கிய நாசதே சத்துவெம் பரப்பில்
ஜீவ ரக்ஷணை விரும்பியோர் திவ்விய நகர்க்குப்
போவ தாகிய பூருவ பாதையைப் புனையத்
தேவ வுத்தரம் பெற்றனர் திருச்சபைக் குரவர்.

மேலை நாண்முதல் மேசியா திருவவ தாரக்
கால மட்டுமங் கங்குதோன் றியநமர் கருதிச்
சால நேர்பிடித் திறைதிரு வுளப்படி சமைத்து
வேலை ஞாலத்து விளக்கிய பாதையை விரிக்கில்.

ஒற்றை யேவழி யோரடித் தடமுடைத் தும்பர்க்
கொற்ற வன்றிரு நகர்செலக் குறித்தது கோணல்
அற்ற நேர்வழி யயலடி பிசகுறி னந்தோ
துற்று காரிருட் சூழலுய்த் திடுமிது துணிபே.