மெய்ப்படு தொண்டர்மின் மினியிற் றோன்றலும் பொய்ப்படு வேடத்தர் பொலிந்தி லங்கலும் செய்ப்படு களைமிகத் தேம்பு சாலியை ஒப்பநின் றுத்தம ரொடுங்கிப் போதலும்.	29
	தூயதஞ் சபைச்சுடர் தூண்டி டாதொளி தேயுறு சீர்மையுந் தீமை மல்கலும் மீயுறு ஞானத்தை வெறுத்த கந்தொறும் மாயவஞ் ஞானத்தை வளர்க்கும் பான்மையும்.	30
	திருவுளத் துணர்ந்துநெட் டுயிர்த்துச் சிந்தைநைந் திருவிழி புனல்கொள விரங்கி யெந்தையார் பொருவருந் திருவருட் புணர்ப்பின் வையகப் பருவரல் துடைப்பலிப் பருவத் தேயெனா.	31
	வித்தக திருச்சபை முறையை மேற்கொண்ட அத்தலை யோரச ரீரி யார்வநம் புத்திர னிருவரை போற்றி யுயம்மினென் றித்தகை வாக்கெழ வெவருங் கேட்டனர்.	32
	மித்தையை வேரற வீசி மெய்பிடித் துத்தம திருப்பணி யுஞற்றத் தக்கமெய்ப் பத்தாபன் னிருவரைத் தெரிந்து பாங்குறச் சித்தஞ்செய் பணியெலாஞ் செயலிற் காட்டுவார்	33
	நித்திய ஜீவராஜ் ஜியத்து நேர்வழி இத்தகு வனவென வியற்றிக் காட்டுமச் சத்தியக் குறிபிடித் தவர்க்குச் சாமிபம் அத்தகு ராஜ்ஜிய மாமென் றாண்டகை.	34
	கண்டகங் கடுப்புத ரடர்ந்த கான்வழி கண்டகங் கடுப்புறக் களைந்து வேரறக் கண்டகங் கொடுதடிந் தனர்வன் கண்டகன் கண்டகஞ் சிதைத்தசெங் கமலப் பாதனார்.	35
	ஒப்புர வாக்கிநூ லொழுங்கி னேருறச் செப்பனிட் டருளியாத் திரிகர் செவ்வழி தப்பிடி லதோகதி சார்வ ரென்றயல் குப்புறா திருசுவர் குயிற்ற வுன்னியே.	36