கொலைசெய் யற்கவென் றுரைத்தகற் பனையுண்மை குணிக்கில் புலைசெய் கோபமு மிகழ்ச்சியும் பிறர்நெஞ்சு புண்பட் டுலைய மீப்படிற் கொலையுமா மாதலி னுடையார் நிலைமை யாமெரி நரகபா தலமென நினைமின். 53
	விபச ரித்திடா யென்பது விதியதை விரிக்கில் தபசி யேனுமற் றொருத்திபா லிச்சையுட் டரிக்கில் அபச ரித்தனா மாக்கினை யடைந்தன னவனை உபச ரிப்பதும் நரகபா தலமென வுணர்மின். 54
	உள்ள தையுள தென்றுரை யாடுமி னிலதை விள்ளு மின்னில தேயென விதனின்மேற் பட்ட கள்ள வாசகம் யாவையுங் கருதருந் தீங்கென் றெள்ளு மின்சுவி சேஷமார்க் கத்தியல் பிதுவே. 55
	திருகை ஞாலத்துப் புகழ்பெறச் செயுந்தரு மத்தில் வருகை யொன்றிலை மறுமையிற் புகழ்மதி யாதிங் கொருகை செய்வதை மறுகையுற் றறிகிலா துஞற்றில் பெருக மாண்பய னளிப்பர்நும் பிதாவுள மகிழ்ந்தே. 56
	துறைதொ றும்புகழ் நச்சிவீண் மொழிகளைத் தொகுத்துப் பறைய றைந்தெனப் புரிஜெபம் பயன்படா தென்றும் அறையி லந்தரங் கத்திலே சந்நிதி யடுத்துக் குறையி ரந்துமன் றாடுமி னருள்வர்நங் கோமான். 57
	செறுத்து மக்குமற் றவர்செயுந் தீமையைச் சிந்தை நிறுத்தி டாதுமன் னிப்பிரேல் நீர்செய்தீ மைகளும் பொறுத்து மக்குமன் னித்தருள் புரிவர்பூ தலமுற் றொறுத்தி டற்கதி காரியா முன்னதத் தரசன். 58
	உரிய மாநிதி துறுமிடத் துறுமும திதயம் அரிய வானிதித் திரட்கரு வூலத்தை யாக்கித் துரிய பூமியிற் றொகுமினோ பூச்சியுந் துருவும் திரியுஞ் சோரரு யில்லையப் புனிதசேத் திரத்தில். 59
	ஒருவ னூழிய மிரண்டிய மாநருக் குஞற்றில் ஒருவ னட்பொரு வன்பகை யாமுல கியற்கை ஒருவு மின்னுல கூழிய மூர்த்தநாட் டரசன் ஒருவர்க் கேயினி தூழியஞ் செய்மினுள் ளுவந்து. 60