வித்தி டாபயிர் விளைத்திடா விளைந்தவை சேர்த்து வைத்தி டாவொரு களஞ்சியத் தெனினும்வான் பறவைக் கத்த னார்பரிந் தெத்தனை யாவுண வளித்து நித்த மும்பரி பாலனஞ் செயுமரு ணினைமின். 61
	கான மல்குபூ மலர்க்குலங் கவின்பெறு காட்சி ஞான நாயகன் றொழிலலால் நவிலமற் றில்லை மேன லம்பெறு சாலமோன் வேந்துமவ் விதத்தில் தான ணிந்துடை தரித்தில னாலிந்த ஜகத்தில். 62
	சொன்ன மற்றிவை துணிந்துநீர் யாமெதைத் துய்த்தும் இந்நி லத்தெதை யுடுத்துமென் றேக்குறா திருமின் பொன்னி லத்தர சன்பிதா வாதலிற் புதல்வீர் நன்ன லத்தவூ ணுடைதெரிந் தளிப்பாநா ணாளும். 63
	அழிவி லாப்பர லோகவாழ் வொன்றையே யவாவி ஒழிவி லாதுளங் கவலுமின் முயலுமி னுண்மை வழிவி டாதுநே ரோடுமின் மற்றவை யெல்லாம் பழிப டாதுமகீ கருளுவ ருன்னத பரமன். 64
	உற்று நோக்கியுன் கண்ணுறு முத்திர மொழித்த பிற்றை யந்நியன் கட்டுரும் பெடுத்தெறி பெற்றி தெற்றென் றோர்வையீ தன்றிநீ பிறர்பிழை தெரிந்துன் குற்ற முள்ளுறப் புதைத்திடல் கொடியமா மாயம். 65
	எந்த நீதியிற் பிறர்குற்றங் கண்டுதீர்ப் பிடுதிர் அந்த நீதியி னுங்குற்றங் கண்டுதீர்ப் படைவீர் எந்த வாறெந்த நாழியிற் பிறர்க்களந் திடுதிர் அந்த வாறளக் கப்படு முமக்குமென் றறிமின். 66
	அரிய நித்திலக் கோவைநீர் பன்றிமீ தணியில் தெரிகி லாதத னருமையைச் சீரழித் திடுமால் உரிய மாண்பரி சுத்தவூண் குக்கல்முன் னுய்த்துச் சொரிய கிற்பினு மன்னவா மென்பது துணிமின். 67
	கேட்டுந் தேடியுந் தட்டியுஞ் சிந்தனை கிடைப்பர் நாட்டு மானிட ராதலின் நம்பனை யடுத்துக் கேட்டுந் தேடியுந் தட்டியு முயன்றிடிற் கிடையா வீட்டு வாழ்வுகை யுறுமிது சரதமாம் விரைமின். 68