பஞ்சம் தொடங்கிய மூன்றாண்டைப்

      பார்த்தவர் தங்கள் பசியினிலும்

நெஞ்சைக் குடையும் பெருந்துயராய்

      நின்றது வளர்த்தக் கால்நடைகள் !

எஞ்சிக் கிடைத்த புற்பூண்டு

     எல்லாம் கருகிப் போனதினால்

மிஞ்சிய கால்நடை அரசிடமே

     விற்றுப் பெற்றனர் தானியமே !

பதுங்கித் தாக்கும் பசியரக்கன்

     பலத்தை யொடுக்கும் போர்முனையில்

வதங்கித் தவிக்கும் மக்களினை

      வாழச் செய்திடும் பெரும்பணிக்கு

முதன்மை தந்திடும் யூசுபினை

     முற்றுகை யிட்டன கால்நடைகள்;

இதனைக் காக்கும் பொறுப்பினையும்

     ஏற்றிட இசைந்தார் நல்லமைச்சர்.

காயும் நாளில் † மழையாகிக்

     கதிரும் பயிரும் அழித்தவிதி

பேயும் நாளில் ‡ கொடும் வெயிலாய்

     பிறநாட் டினையும் சுட்டெரிக்கத்

தாயும் சேயும் தந்தையுமாய்

     தானியம் வாங்கிட மிசுரினுக்கே

மேயும் ஒட்டகை மீதமர்ந்தே

     வேற்றூர் மக்கள் வரலானார் !

பெரும்விலை தரினும், தானியங்கள்

     பிறநாட் டவர்க்கு விற்பதெனில்

ஒருமுறை மட்டிலும் வழங்கிடவே

     ஒப்புதல் தந்த பேரமைச்சர்

வருபவ ரிடையே கன்னானில்

     வாழ்பவர் எவரும் வந்தாரேல்

ஒருவரைத் தம்பால் அழைத்துவர

     உத்திரவிட்டே உளம் சோர்ந்தார்.

† காயும் நாள் : கோடை காலத்தைக் குறிப்பது

‡ பேயும் நாள் : மழை காலத்தைக் குறிப்பது.