அவா முதலியன அழிகின்றன,’ என்றும், ¹‘பரபத்தியால் என்னை உண்மையாக அறிகின்றவன் பிறகு என்னையே அடைகின்றான்,’ என்றும் சொல்லுகிறபடியே, சில வருத்தங்களோடே காணக்கூடிய சாதன பத்தியை அன்று இங்குச் சொல்லுகிறது; காணவேண்டும் என்னும் ²ஆசை சிறிதுடையார்க்கும் அவன் எளியனாம்படியைச் சொல்லுகிறது. ‘ஆயின், அறப்பெரியவன் ஆசை சிறிது உடையார்க்கு எளியனாகை கூடுமோ?’ எனின், அறப்பெரியவன் தாழ நிற்கும் அன்று தடை செய்குநர் எவருமிலர். ‘ஆயின், அறப்பெரிய அவன் இம்மண்ணுலகில் வந்து அவதரித்தான் என்பது பொய்யே அன்றோ?’ எனின், ³‘பகைவர்களை அழியச் செய்கின்ற அருச்சுனா, எனக்கும் பல பிறவிகள் கழிந்தன; உனக்கும் பல பிறவிகள் கழிந்தன; ஆயின், அப்பிறவிகள் பலவற்றையும் யான் அறிகின்றேன்; அவற்றை நீ அறியாய்,’ என்று அருச்சுனனை நோக்கி, ‘நீ பிறந்தது போன்று, நானும் பிறக்கின்றேன்,’ என்கிறான் கிருஷ்ணன்; அருச்சுனன் பிறந்தது பொய் அன்று; ஆதலால், இறைவன் அவதரித்ததும் பொய் அன்று.

    ‘ஆயின், அருச்சுனன் பிறவிக்குக் காரணம் கர்மம்; இறைவன் பிறவிக்குக் காரணம் யாது?’ எனின், இச்சையே; இதுதன்னை அவதார ரஹஸ்யத்தில் ⁴தானும் அருளிச்செய்தான் அன்றே, ⁵‘என்னுடைய பிறவிகளும் பிறவிகளிற் செய்யப்படுகின்ற தொழில்களும் தெய்வத்தன்மை வாய்ந்தவை,’ என்று? அதாவது, ‘என்னுடைய பிறவிகள் கர்மம் அடியாக அல்ல; இச்சை அடியாக இருக்கும். ⁶நாம் பிறவாநிற்கச்செய்தே பிறவாமையும் கிடக்கும்; தாழ நின்ற நிலையிலே மேன்மையும் கிடக்கும்; ⁷அப்ராக்கிருத சம்ஸ்தானத்தை இதர சஜாதீயமாக்கி வந்து பிறப்போம்; இவற்றுள்

1. ஸ்ரீ கீதை, 18 : 55.

2. ‘பத்துடை அடியவர்க்கு எளியவன்’ என்றதனை நோக்கி, ‘ஆசை
  சிறிதுடையார்க்கும் அவன் எளியனாம்படியைச் சொல்லுகிறது’ என்கிறார்.

3. ஸ்ரீ கீதை, 4 : 5.

4. ‘தானும் என்ற உம்மை, பராசுரர் முதலிய மஹரிஷிகளைத் தழுவுகின்றது.

5. ஸ்ரீ கீதை, 4 : 9.

6. “முதன்முறை இடைமுறை கடைமுறை தொழிலின்
   பிறவாப் பிறப்பிலை; பிறப்பித்தோ ரிலையே”

(பரிபா. 3: 71 72.)

  என்னும் பகுதி இங்கு ஒப்பு நோக்கத்தகும்.

7. அப்ராக்ருத சம்ஸ்தானம் - பிரகிருதி சம்பந்தமில்லாத திருமேனி, இதர
  சஜாதீயம் - மற்றைச் சாதிகளோடு சேர்ந்ததாக.