ஆறாந்திருவாய்மொழி - “கடல்ஞாலம்”

முன்னுரை

    ஈடு :- ¹மேல் திருவாய்மொழியிலே பிரீதியும் பிரீதி இன்மையும் சமமாக அன்றோ சென்றன; இரண்டுமாய்க் கலந்து சென்றால் பிரீதியாலே தலை எடுக்கவும் ஆம் அன்றோ, அது செய்யாதே, புண்ணியத்தின் குறைவால் பிரீதி இன்மை ஒன்றே தலை எடுத்தது; ஆகையாலே, மேல் உருவெளிப்பாட்டாலே அவனை நினைத்துத் தரித்தது ஒரு நிலையும் போய், அலாபத்தால் வரும் துவட்சியே ஆயிற்று; இப்படித் துவண்ட இவள், பிரிவாற்றாமையாலே அவனை அநுகரித்துத் தரிக்கப் பார்க்கிறாள் இத்திருவாய் மொழியில்.

    ஒவ்வோர் அர்த்தத்தைப்பற்றி உபந்யாசங்கள் செய்ய இருப்பாரைப் போலே ஞான முத்திரையும் தானுமாய்க் கீதோபநிடத ஆசாரியனைப் போலே இருந்தாள்; இதனைக் கண்ட திருத்தாயார், ‘இது ஏதேனும் மணிமந்திர ஒளஷதம் முதலியவைகளாலே வந்த விகாரமோ’ என்று ஐயங்கொண்டு, அத்தன்மைகள் காணாமையாலே ‘அவை அல்ல’ என்று அறிந்தாள். இனி, ²‘அவனைப் பிரிகையாலே வந்த ஆற்றாமையாலே அநுகரித்துத் தரிக்கிறாள்’ என்று தெளிய மாட்டுகின்றிலள் தன் கலக்கத்தாலே. இவ்வளவிலே புகுந்து ‘இதுதான் என்?’ என்று வினவப் புகுந்த ³உறவினவர்களைப் பார்த்துத் திருத்தாயார், அவனுடைய வார்த்தைகளைப் பேசுகையால் வந்த ஒற்றுமையாலும், ஞானமுத்திரை பார்வை முதலியவைகள் இருந்தபடியாலும், சர்வேச்வரன் இவள்பக்கல் ஆவேசித்தானாக வேணும் என்று சொல்லுகிறாள், ‘அநுகரித்துத் தரிக்கிறாள்’ என்று அறியமாட்டாமையாலே.

___________________________________________________

1. மேல் திருவாய்மொழிக்கும் இத்திருவாய்மொழிக்கும் இயைபு
  அருளிச்செய்கிறார் ‘மேல் திருவாய்மொழியிலே’ என்றது முதல், ‘இத்
  திருவாய்மொழியில்’ என்றது முடிய. அநுகரித்தல்-அவன் சொல்லும்
  வார்த்தைகளைத் தானும் சொல்லுதல். கீதோபநிடத ஆசாரியன் - ஸ்ரீ
  கிருஷ்ணன்.

2. அநுகரிக்கிறாள் என்று தெளியலாகாதோ? என்ன, அதற்கு விடை
  அருளிச்செய்கிறார் ‘அவனைப் பிரிகையாலே’ என்று தொடங்கி.

3. இத்திருவாய்மொழியில் வருகின்ற “உற்றீர்கட்கு” என்றதனை நோக்கி
  'உறவினர்களைப் பார்த்து’ என்கிறார்.