ம - ள - ள - ஸ்ரீ சி. கே. சுப்பிரமணிய முதலியார் அவர்களுக்கு உபயக்ஷேமம்.

     தாங்கள் நீண்டகால அருமையான உழைப்பினால் ஏற்பட்ட ஓர் உன்னதகாரியமாகிய "பெரிய புராண விரிவுரை எழுத்து நிறைவு விழா" சிதம்பரத்தில் நடத்துவதாய்த் தெரிய மிகவும் சந்தோஷப்பட்டேன். அவ்விடத்திய ஆயிரக்கால் மண்டபத்தில் நடைபெறும் சமயம் அவ்விடமிருந்தால் எவ்வளவு மன மகிழ்ச்சி ஆனந்தம் உண்டாகும் என்று நினைத்துக்கொள்ளத்தான் முடிகிறது. திருவருட்கிருபையால் விழா இனிமையுடனும் விமரிசையுடனும் நடைபெறுமாகவும். இவ்வித சேவையில் தாங்கள் மென்மேலும் ஈடுபடவும் சுகம் நீண்டகால வாழ்க்கையும் பெறப் பிரார்த்திக்கிறேன்.

     சிவக்கவிமணி சுப்பிரமணிய முதலியார் அவர்கள் திவ்விய சமூகத்திற்கு, அடியேன் வணக்கம்.

     தங்களன்பான கடித அட்டை கிடைக்கப்பெற்றுச் சிற்பரனின் திருவடியைச் சிந்தையிலே வைத்துச் செப்பரியவானந்தம் திளைக்கின்றவரின் இன்ப நிலையை அடியேனும் பெற்றேன். தாங்கள் எடுத்துக்கொண்ட இந்தச் சிவத்தொண்டு தங்கள் தவத்தின் பெருமைக்கோர் அறிகுறியாகத் தமிழ்மொழி வழங்கும் நிலத்தில் நீடூழி வாழ்ந்திருக்கும், மனம் அதிக மகிழ்ச்சியடைந்ததால் என்ன எழுதலாம்; என்று கூடத்தெரியவில்லை - கைம்மாறாகத் தங்களுக்கு நாம் செய்வதொன்றில்லை -