அத்தகைய நஞ்சை விளைவிக்கும் பாவமே எங்கும் பரந்து
கிடந்தமையால், அதனை நினைந்தால் நினைந்த நினைவும் நஞ்சாகி விடும்;
அதனைப் பற்றிச் சொன்னால், சொல்லிய வாயுமே நஞ்சாகிவிடும்; தேனை
அணுகினால், அணுகிய திசையெல்லாம் நஞ்சாகி விடும்.

     'அன்றோ' அசைநிலை.

 

8

நிழலி னஞ்சுறும் வெய்யிலி னஞ்சுறு நெடுநீர்க் கழனி நஞ்சுறுங் கடிமலர் நஞ்சுறும் பொலிந்த பொழிலி னஞ்சுறும் புணர்கனி நஞ்சுறு மடவா ரெழிலி னஞ்சுறுங் காண்டலா லின்னுயி ரிறக்கும்.

நிழலின் நஞ்சு உறும்; வெய்யிலில் நஞ்சு உறும். நெடு நீர்க் கழனி நஞ்சு உறும்; கடி மலர் நஞ்சு உறும். பொலிந்த பொழிலில் நஞ்சு உறும்; புணர் கனி நஞ்சு உறும். மடவார் எழிலில் நஞ்சு உறும்; காண்டலால் இன் உயிர் இறக்கும்.

     நிழலில் நஞ்சு பொருந்திக் கிடக்கும்; வெயிலிலும் நஞ்சு பொருந்திக்
கிடக்கும். நீருள்ள நெடிய வயல் நஞ்சாகிவிடும்; மணமுள்ள மலரும்
நஞ்சாகிவிடும்; அழகிய சோலையில் நஞ்சு பொருந்திக் கிடக்கும்; மரங்களிற்
பொருந்திய கனியும் நஞ்சாகி விடும். மகளிர்தம் அழகிலே நஞ்சு பொருந்திக்
கிடக்கும்; அந் நஞ்சைப் பார்ப்பதாலேயே இனிய உயிர் இறந்துபடும்.