வேத நூலை மறந்த மக்கள் கருதற்கு அரிய பாவங்களைச்
செய்தமையால், விண்மீன்கள் உலகத்திற்கு ஒளி தருதலையும் மறந்தன;
விரும்பத் தக்க மேகங்கள் மழை வழங்கவும் மறந்தன; செழுமையான
மலர்கள் தேனைப் பொழிதலும் மறந்தன.
 

12

அறம டிந்தன வடைந்தன தீயவை யனைத்தும் மறமி டைந்தன மறந்தன தருமமே வஞ்சத் திறநி றைந்தன தீர்ந்தன தவங்களே விரதம் புறமு ரிந்தன பொதிர்ந்தன பகைசெயும் புரையே

அறம் மடிந்தன;அடைந்தன தீயவை அனைத்தும்; மறம் மிடைந்தன; மறந்தன தருமமே; வஞ்சத் திறம் நிறைந்தன; தீர்ந்தன தவங்களே; விரதம் புறம் முரிந்தன; பொதிர்ந்தன பகை செயும் புரையே.

     புண்ணியங்கள் மடிந்தன; தீயவை யாவும் வந்து அடைந்தன;
பாவங்கள் செறிந்தன; தருமங்கள் மறக்கப்பட்டன; வஞ்சகத் திறமைகள்
நிறைந்தன; தவங்கள் நின்று போயின; விரதங்கள் புறத்தே சென்று
அழிந்தன; பகை செய்யும் குற்றங்கள் குவிந்தன.
 

13

விண்கி ழித்திழி வெள்ளநீர் சிறைசேயு முழுநர் மண்கி ழித்துழ வழங்கிய கொழுவினை நீட்டிப் புண்கி ழித்துநெய்ப் புனலொடு போர்முகத் தஞ்சா கண்கி ழித்தொளி கான்றவே லாக்கின பகையே.

விண் கிழித்து இழி வெள்ள நீர் சிறை செயும் உழுநர் மண் கிழித்து உழ வழங்கிய கொழுவினை நீட்டி, புண் கிழித்து நெய்ப் புனலொடு போர் முகத்து அஞ்சா கண் கிழித்து ஒளி கான்ற வேல் ஆக்கின பகையே