தான் அணுகத் தகாத ஆசையாகக் கொண்டு திருமணத்தையும்
தவிர்த்து நிற்கின்ற அரும் பெருந் தவத்தோனாகிய சூசையும், மாமுனிவனும்
தலைமைக் குருவுமாகிய சீமையோன் விடுத்த கட்டளை அது ஆகையினால்
பணிந்து, பெருமையுள்ள சிறந்த மணிகளால் அழகு செய்யப்பட்ட கோவிலை
அடைந்தான்.

     தவிர்கின்ற + அரு - 'தவிர்கின்றவரு' எனற் பாலது தொகுத்தல்
விகாரம். 'ஆல்' அசைநிலை.
 

57

குருமாமணி யாலொளிர் கோயிலினுட் டிருமாதினை வேட்டுமெ லாருமுறப் பொருவா தொளிர் பூங்கொடி யைக்கொணர்வா னருமாமுனி யங்கண றைந்தனனால்

குரு மா மணியால் ஒளிர் கோயிலினுள் திரு மாதினை வேட்டும் எலாரும் உற, பொருவாது ஒளிர் பூங்கொடியைக் கொணர்வான் அரு மா முனி அங்கண் அறைந்தனன் ஆல்.

     செந்நிறமுள்ள சிறந்த மாணிக்கத்தால் ஒளிரும் கோவிலினுள்
அவ்வழகிய பெண்ணை அடைய விரும்பி எல்லாரும் வந்து சேரவே, அரிய
பெரிய முனிவனான சீமையோன் ஒப்பற்று ஒளிரும் பூங்கொடி போன்ற
மரியாளை அங்கு அழைத்து வருமாறு கூறினான்.

     'ஆல்' அசைநிலை

 

58

தன்னிற்றவி ராத்தகு பற்றளவா யுன்னித்தவி ராப்பய மோங்கியபோற் கன்னிக்கழி வாகுமெ னாக்கதனந் துன்னிக்கலுழ் வாள்சுடர் சுந்தரியாள்.