அழகிய கதிரவனையும் ஒளியால் வாட்டும் இவளது தெய்வீக மகிழ்ச்சி
பொங்கும் கண்கள், கூர்ந்து நோக்கிய கண்களாயின், காம நெருப்பை
அவித்தன; மூடிய கண்களாயின், அச்சத்தோடு கூடிய கலகத்தை வரவிட்டன;
விழித்த இரு கண்களாயின், இன்பம் தரும் மோட்ச கதியையே
இங்குக்கொண்டுவந்து காட்டும்.

     விழித்த + இரு - 'விழித்தவிரு' என்பது, 'விழித்திரு' எனத் தொகுத்தல்
விகாரம் கொண்டது.
 

91

வில்லே வியகோல் விழியா ரறைதீஞ் சொல்லே யுயிருண் ணெனவே சொலுவார் கொல்லே தமிலாக் குதலைச் சொனலா ணல்லே யுயிர்காக் குநவின் றசொலால்.

வில் ஏவிய கோல் விழியார் அறை தீம் சொல்லே உயிர் உண் எனவே சொலுவார். கொல் ஏதம் இலாக் குதலைச் சொல் நலாள் நல்லே உயிர் காக்கும் நவின்ற சொலால்.

     வில் ஏவிய அம்பு போன்ற கண்களை உடைய மகளிர் சொல்லும்
இனிய சொல்லுமே ஆடவர் உயிரை உண்ணுமென்று அறிந்தோர் கூறுவர்.
கொல்லும் குற்றமே இல்லாத மழலைச் சொல்லை உடைய நல்லவளாகிய
மரியாள் தான் சொல்லிய சொல்லால் உயிர்களை நன்றாகவே காப்பாள்.

     'காக்கும் - காப்பாள்: செய்யும்' என் முற்று பெண்பாலுக்கு வந்தது.
இரண்டாமடியில் 'உண்' என்ற சொல் 'உண்ணும்' என்ற பொருளில் நின்றது.