மயக்கம் என்று சொல்லத்தக்க பாவக்கறை சிறிதும் இல்லாத சூசை,
அந்தச் சிறு மனையின் வேறு ஓர் அசையில் உறங்கி விழித்து, வழக்கம்போல்
ஆண்டவன் அடிகளைத் தொழும்போது, காரணம் அறியாமல், தன் உள்ளம்
அறிவு கடந்த பெருமை கொள்ள இன்பத்தில் ஆழ்ந்தான்.

     காண்டிலன் - 'கண்டிலன்' என்பது நீட்டம் விகாரம் கொண்டது.

53

வைய நாயகன் வையகத் தாரெலா முய்ய வந்துல குற்றன னோவெனா வைய மாயிறை யோனைய ருச்சனை செய்ய வீழ்ந்தும கிழ்ந்தருட் சீர்த்தனர்.

'வைய நாயகன் வையத்தார் எலாம் உய்ய வந்து உலகு உற்றனனோ?' எனா ஐயம் ஆய், இறையோனை அருச்சனை செய்ய வீழ்ந்து மகிழ்ந்து, அருள் சீர்த்தனன்.

     'உலக நாயகனாகிய ஆண்டவன் உலகத்தார் அனைவரும் பாவ மீட்பு
அடைந்து உய்யுமாறு வந்து இவ்வுலகை அடைந்தானோ?' என்று ஐயம்
கொண்டவனாய், ஆண்டவனை வழிபாடு செய்ய விழுந்து தொழுது மகிழ்ந்து,
தெய்வ அருள்கொண்டு சிறந்தான்.