சிறந்த மலர்க் கொடியை உடையவனாகிய சூசை திருமகனாகிய
ஆண்டவனைப் பார்த்த அதே வேளையில், ஆண்டவனும் அவனைப்
பார்த்தான்: ஒன்றுபட்ட ஆசையோடு அவ்விருவர் கண்ணும் எதிர்ப்பட்டு,
அதனால் எழும் மிகுந்த ஆர்வத்தை எடுத்துக் கூறவும் இயலுமோ?

     நேர்தல், கூர்தல் என்பன, செய்யுள் ஓசைப் பொருட்டு, நேர்த்தல்,
கூர்த்தல் என நின்றன. ஆம் கொலோ - இடையே 'கொல்' அசைநிலை.
 

88

தண்ணந் தாமரை தாதவி ழச்சுடர் கண்ணங் காங்கதி ராற்கனி பார்த்தெனா விண்ணங் காவலன் பார்த்துவி ழைந்துளத் தெண்ணந் தாவுணர் வின்பொடு ணர்த்தினான்.

தண் அம் தாமரை தாது அவிழச் சுடர் கண் அங்கு ஆம் கதிரால் கனி பார்த்து எனா, விண் அம் காவலன் பார்த்து விழைந்து, உளத்து எண்ணம் தாவு உணர்வு இன்பொடு உணர்த்தினான்:

     குளிர்ச்சி கொண்ட அழகிய தாமரையின் இதழ்கள் விரியுமாறு
ஆதவன் அங்குத் தன் கண்களாகிய கதிர்களால் கனிவோடு
பார்த்ததுபோல், விண்ணுலகிற்கு அழகிய காவலனாகிய ஆண்டவன்
சூசையை ஆசையோடு நோக்கி, அவன் உள்ளத்தில் எண்ணத்தையெல்லாம்
கடந்த உணர்வுகளை இன்பத்தோடு பின் வருமாறு உணர்த்தினான்: