"மலரைக் காட்டிலும் இலவம் பஞ்சைக் காட்டிலும் மெல்லிய
உடலைக் கொண்டுள்ள அம்மகனை, தொழிலினால் காய்ப்பு ஏறிய
உறுதியான கைகளில் இனி அடிமையாகிய நான் ஏந்தவுங் கூடுமோ? அது
வாய்த்ததாயின், என் உயிர் அம் மகிழ்ச்சியால் பிரியாதிருத்தலுங் கூடுமோ?

 

103

ஒளிப்பட வுயர்ந்தபே றொன்று மின்றியும் வெளிப்பட மனுப்புரம் வேய்ந்த நாயக னளிப்பட மலர்ப்பத நயந்து சென்னிமே லளிப்பட விருத்தியா னணித லாங்கொலோ.

"ஒளிப் பட உயர்ந்த பேறு ஒன்றும் இன்றியும், வெளிப் பட மனுப் புரம் வேய்ந்த நாயகன் நளிப் பட, மலர்ப் பதம் நயந்து சென்னிமேல் அளிப் பட இருத்தி, யான் அணிதல் ஆம்கொலோ?

      "புகழப்படுதற்கென்று உயர்ந்த பேறு ஒன்றும் எனக்கு இல்லாதிருந்தும்,
உலகிற்கு வெளிப்படுமாறு மனித உடலை அணிந்துகொண்ட ஆண்டவன்
குளிர்ச்சி அடையுமாறு, அவனது மலர் போன்ற அடிகளை விருப்பத்தோடு
என் தலைமேல் அன்று தோன்ற இருத்தி, நான் அணிந்து கொள்ளவுங்
கூடுமோ?

 

104

திருந்துபூஞ் சிகழிகை பூண்ட சீரெனப் பொருந்துபூந் திருவுடல் போர்த்து நின்வயிற் றிருந்துபூ விடையவன் பிறந்த வெல்லையின் வருந்துபூ வெழச்செயும் வளப்பெ வன்கொலோ.