கிளை படர்ந்த பெரிய மரங்கள், அது மலர் தரும் பருவம்
அல்லாதிருந்தும், தாம் தந்து நின்ற இனிய கனிகளோடு இயையப் பூத்து
நின்றன. அது, மனித உடலை அணிந்துகொண்ட ஆண்டவன் விளைவித்த
நன்மையால் அமைந்த இன்பத்தினால் சிரித்தது போல் தோன்றும்.

 

103

பொதிர்செய் மாட்சி கொண் டுயர்ந்த பூவெலாங் கதிர்செய் வானநேர் களித்த தாமெனி லெதிர்செய் பாப்புகழ்ந் திசைக்குந் தன்மையோ முதிர்செய் மாண்புடை முழையின் றோற்றமே.

பொதிர் செய் மாட்சி கொண்டு உயர்ந்த பூ எலாம் கதிர் செய் வானம் நேர் களித்தது ஆம் எனில், எதிர் செய் பாப் புகழ்ந்து இசைக்கும் தன்மையோ, முதிர் செய் மாண்பு உடை முழையின் தோற்றமே?

     நிறைவான இம் மாண்பு கொண்டு உயர்ந்த பூவுலகம் முழுவதும்
ஒளிபடைத்த வானுலகத்திற்கு நிகராகக் களிப்புற்றதென்றால், முதிர்ந்த
மாண்பு கொண்ட அந்தக் குகையின் தோற்றம், ஒப்புமை காட்டும்
பாடலால் புகழ்ந்து கூறக் கூடிய தன்மையுள்ளதோ?
 

104

வானு லாவனப் பெண்ணில் வானவர் மீனு லாவடி யிறைஞ்சி மீதுபெய் கானு லாமலர்க் கந்த மாரியாற் றேனு லாமழை திளைத்தோர் பாலெலாம்.

வான் உலா வனப்பு எண் இல் வானவர் மீன் உலாவு அடி இறைஞ்சி, மீதுபெய் கான் உலா மலர்க் கந்த மாரியால், தேன் உலா மழை திளைத்து ஓர் பால் எலாம்.

     வானுலகில் உலவும் அழகைக் கொண்ட எண்ணிக்கையற்ற வானவர்
திருக்குழந்தையின் ஒளி பொருந்திய அடியை வணங்கி, அதன் மீது
பொழிந்த காடாகப் பூத்த மலர்களின் வாசனை மழையால், ஒரு
பக்கமெல்லாம் தேனோடு கூடிய மழையில் திளைத்துக் கிடந்தது.