'திளைத்தது' என்ற சொல் இடைக்குறையாய், 'திளைத்து' என நின்றது.
அடுத்து வரும் பாடலில் 'களித்து' என்பதனையும் இது போற் கொள்க.

 

105

பண்ணி னோதையும் பண்ணிற் பாவிசை தண்ணி னோதையுந் தாழ்ந்து வாழ்த்தினர் விண்ணி னோதையும் வழங்க வேட்டுளங் கண்ணி னோகையிற் களித்தோர் பாலெலாம்.

பண்இன் ஓதையும், பண்ணில் பா இசை தண்இன் ஓதையும், தாழ்ந்து வாழ்த்தினர் விண்இன் ஓதையும் வழங்க, வேட்டு உளங் கண்இன் ஓகையின் களித்து ஓர் பால் எலாம்.

     வீணையின் இனிய ஒசையும், வீணையில் பாடலை இசைத்துப் பாடும்
குளிர்ச்சியான இனிய ஒசையும், பணிந்து வாழ்த்திய வானவரின்
விண்ணுலகிற்குரிய இனிய ஒசையும் கூடி இயங்குதலால், ஒரு
பக்கமெல்லாம் உள்ளத்தில் இனிய மகிழ்ச்சியால் விரும்பிக் களித்தது.
 

106

பொன்னி னொள்ளுருப் பொருந்திப் பூணொடு மின்னி னொண்ணுதல் மின்னி வீழ்தரத் துன்னின் புள்ளெழத் தொழுது போற்றலி னின்னின் பார்ந்தன வினிதோர் பாலெலாம்.

பொன்னின் ஒள் உரு பொருந்தி, பூணொடு மினனின் ஒள் நுதல் மின்னி, வீழ்தரத் துன் இன்பு உள் எழத் தொழுது போற்றலின், இன் இன்பு ஆர்ந்தன இனிது ஓர் பால் எலாம்.

     பொன் போல் ஒளி பொருந்திய உருவம் கொண்டு, பூண்ட
அணிகலன்களும் ஒளியுள்ள நெற்றியும் மின்னல் போல் மின்ன, செறிந்த
இன்பம் உள்ளத்தில் பொங்கியெழ வானவர் விழுந்து தொழுது
வாழ்த்துதலினால், ஒரு பக்கமெல்லாம் இனிய இன்பங்கள் இனிதாக
நிறைந்து நின்றன.