என்று இவ்வாறு மிக்கயேல் கூறிய வேளையில், ஏனைய வானோர்,
இனிய இசையை மகர யாழ் தடவிப் பாடி, நன்மை தழுவிய இன்பத்தில்
மூழ்கி, வாழ்த்துக் கூறி, மலையைத் தழுவிய மேகம் குறையாது பொழிந்த
மழைபோல், மணம் தழுவிய மலர் மழையைப் பொழிந்தனர்.

     'குன்று அளாவிய முகில் குன்று இல பொழி மழை' என மாற்றிக்
கூட்டுக. மன்று-மன்றல் என்பதன் கடைக்குறை.

     ஒளி வீசும் சிறந்த மகன் உடலெடுத்துப் பிறந்த எட்டாம் நாள்
ஆகவே, சூசையும் மரியாளும், ஆராயத் தக்க சிறந்த வேதத்தைக்
கற்றறிவாராகிய குருக்களை அழைத்து, அரிய அன்போடு, நிலை பெற்ற
சிறந்த வேதம் வகுத்த நல்ல சடங்கு முறைகளில் எதனையும்
தப்பவிடாமல், நிறைந்த மாண்புள்ள இயேசு என்னும் தூய திருப்பெயரை
அவனுக்கு இட்டனர்.