கல்லில் தீட்டி வரைந்த மறை கடவுள் தந்து, மலை இறங்கி, எல்லின் தீட்டி ஒளிர்ந்த முகத்து எழு மோயிசன், செல் கதி                                          சேர்ந்து, வில்லின் தீட்டி ஊன் உமிழ்ந்த வேல் சோசுவன் அக்குலத்து                                          அரசு ஆய், வல்லின் தீட்டி வளர் தெய்வ மாட்சி காட்டும் உரு ஆனான்.

     "கற்பலகையில் தீட்டி எழுதிய வேதத்தைக் கடவுள் தனக்குத் தந்து,
அதனோடு மலையைவிட்டு இறங்கி, ஞாயிறு போல் தீட்டப்பெற்று ஒளிர்ந்த
முகத்தோடு தலைவனாக யூதரிடையே எழுந்து நின்ற மோயிசன், சென்று
சேரத்தக்க மோட்ச கதியை அடைந்தான். அதன் பின், ஒளியோடு தீட்டப்
பெற்றுப் பகைவர் ஊனை உமிழ்ந்த வேலைத் தாங்கிய சோசுவன், அக்
குலத்திற்கு அரசன் போன்று தலைவனாகி, வல்லமையால் தீட்டப் பெற்று
வளரும் கடவுள் மாட்சியை இவ்வுலகிற்கு எடுத்துக்காட்டும் உருவமாய்
விளங்கினான்.

     அருவப் பொருளாகிய கடவுளின் வல்லமையை உலகிற்குக் காட்டும்
உருவப் பொருளாக விளங்கினான் சோசுவன் என்பது கருத்து. மறை -
வேதம்; இங்கு வேத நெறியாகிய பத்துக் கட்டளைகளைக் குறித்தது.
அதனைக் கடவுள் மோயிசனுக்குத் தந்த செய்தி, 18-வது, சீனயி மலை
காண் படலம் காண்க. சோசுவன் வெற்றிச் செய்தி: ப. ஏ., ஜோசுவா
ஆகமம் காண்க.

     'அரசு' என்றாரேனும், அரசன் போன்ற தலைவன் என்றே கொள்க.
சவுலுக்கு முன் யூதர்களுக்கு அரசன் இல்லை.