"கருமேகங்கள் தவழும் மலையின்மேல் பிறந்து, கதிரொளியை
மிகுதியாகப் பொழியும் மணிகளைக் கரையிற் கொழித்து, மாலை
தவழ்வதுபோல் மலையைச் சுற்றிலும் விளங்கி, குளிர்ந்த இதழுள்ள
மலர்களின் உள்ளே தவழ்ந்து நடந்து, சிறப்புக்களெல்லாம் பொருந்திய
இந்நாட்டில் பரந்து பாய்ந்து, தான் செல்லும் இடமெல்லாம் செல்வத்தைக்
கொண்டு செலுத்தும் சோர்தான் என்னும் இவ்வாற்றை யூதர் நெருங்கி
வந்தடைந்தனர்.

     'அலர்' நீரின் மேற்பரப்பில் பரந்து மூடிச் செல்லும் மலர் என்க.

     "தெளிந்த அழகிய குளிர்ந்த கடல் நீரைப் பருகி உயர்ந்தெழுந்த
மேகங்கள் மின்னித் திரண்டு முழங்கி, இடம் பரந்த அழகிய மலையின்
உயர்ந்த சிகரம் மகிழுமாறு பொழிந்த வெள்ளத்தோடு கூடி, குளிர்ந்த
அழகிய மணம் கொண்ட முல்லை நிலத்தில் வந்து பெருகி, அழகு
கொண்ட இந்நாடு மகிழ்ந்து செழுமையில் ஓங்குமாறு, அந்நாளில்
இப்பேராறு இடையறாமல் பாய்ந்தோடும்.