"கடல் வெள்ளத்தை மடை திறந்து விட்டாற்போல, எமக்கும்
தமக்கும் இடையில் எவ்விடத்துமுள்ள பகைவர் யாவரும், எம்மைச்
சுற்றிலும் பூமி முழுவதும் தம் நடமாட்டம் பொருந்தப் படை கொண்டு,
எம்மை இன்று பகைத்து வந்துள்ளனர்.

     "மலை போன்ற யானையும், காற்றுப் போன்ற குதிரையும், முறை
போன்ற வில்லும், மழைத்துளி போன்ற அம்பும், கல் போன்ற நெஞ்சும்
பொருந்திய அப்பகைவர் தம் சேனைகளே நிலை கொள்ளாமலும் நிகர்
இல்லாமலும் பூமியெங்கும் நிறைந்துள்ளன.

     "பூமியைக் கிழித்த தன்மையாய்ச் சக்கரத்தால் இயங்கும் தேர்களின்
கூட்டம், போர்க் களத்தைக் கிழித்து வந்த சினந்த கடலின் திரை
தானோ? கடலைக் கிழித்துச் சென்ற கப்பல் தானோ? சிறகால் பறந்து கரு
மேகத்தைக் கிழித்துச் சென்ற கல்மலைக் கூட்டத்தானோ?