"கூற்றுவன் போலச் சோசுவன் சினந்து, இந்தப் பேச்சை
முடிப்பதற்கு முன்னே, 'மாறுபாடு கொண்ட நம் சேனை ஆண் சிங்கக்
கூட்டம் போல் போருக்கு எழுக!' என்று கூறி, தான் ஓர் உயர்ந்த தேரில்
ஏறிக் காற்றுப்போல் பறந்து போகவும், செந்நிற நெருப்பைக் கக்கும்
ஊற்றுப் போலக் கதிரைச் சிதறி ஒளிரும் படையும், உலகமே கலக்கமுற்றுக்
கூசுமாறு அத்திசை நோக்கிச் சென்றது.

     'ஒளிர் படை' என்றது, அணிந்த அணிகளாலும் தாங்கிய
ஆயுதங்களாலும் ஒளிரும் படை என்று கொள்க. 'அன்றே' அசை நிலை.

     "தேர்கள் காற்றுப் போன்ற வேகத்தில் சக்கரத்தோடு பறந்தாற்
போலச் செல்லவும், குதிரைகள் அம்பு போல் பாய்ந்து செல்லவும்,
முழங்கி எரிக்கும் இடியைச் சூலாகக் கொண்ட மேகம் போலும்
என்னுமாறு யானைகள் செல்லவும், போருக்கு ஏற்ற புலிகளின் கூட்டம்
மொய்த்த தன்மை போலும் என்னுமாறு காலாட்படை செல்லவுமாகச்
சோசுவன் படை வீரர் சென்று, பகைவரின் கொடும் படையைத் தம்
எதிரே கண்டனர்.