முன் பாடலில் வைத்த முறைப்படி, இங்கும் கனையன் இடப் புறமும்
அச்சுதன் வலப் புறமும் உள்ள எதிரிகளோடு மோதினர் எனக் கொள்க.
இரு புறந்து அணியும் கூறி, சோசுவனும் முட்டினாள் எனவே, அது நடுவணி
என்பது பெறப்பட்டது. வல் + யானையர் - 'வல்லி யானையர்' என யகரப்
புணர்ச்சியில் இகரம் தோன்றிற்று.

     "கரு மேகத்தில் தோன்றும் இடி முழக்கமும், காற்றோடு கூடிய கடல்
நீரின் முழக்கமும் ஒப்பாதல் இல்லாத கொடிய அப்போரில் விளைந்த
முழக்கம், மேலே எழுந்து பொங்கியதனால், இம் மண்ணுலகில் விளைந்த
கலக்கம் நான்கு திசைகளிலும் பரந்தது.

     "போர் முனையைத் தான் காணுதலும் புனைந்த வெற்றியின் சிறப்பைத்
தன் முகமாக்கிக் கொள்ளுதலும் ஆகிய இரண்டும் சேர்ந்து ஒன்றாகி,
இவ்வாறு என்றும் புகழ் நிறைந்த முகத்தோடு விளங்கும் வேத மன்னனாகிய
சோசுவன், அன்று மட்டும், தன் வில்லை வளைத்தவிடத்து அதற்கு எதிரான
ஒரு நிலையைக் கண்டான்.