"உயிர்களைக் கொல்லத் தடவித் திரியும் யமனுக்கு இணையாகப்
பெரிய வில்லை வளைக்கும் கனையன் நடத்திச் செல்லும் மத யானையின்
நடு நெற்றியில் நுழையுமாறு தான் செலுத்தி விட்ட அம்புகள் தைத்தன
என்று கண்டு இகுலன் களிப்படைந்தான். அக்கனையனும் கடும்
தன்மையாகத் தன் வில்லாற்றலால் அம்புகளை அளவற்ற தொடுப்புகளாக
ஏவிக் கொண்டிருந்தான்.

     'அந்தகன்' என்ற தன் மற்றொரு பெயருக்கு ஏற்ப, 'தடவித் திரி
யமன்' என்ற பொருத்தம் காண்க.

     "இவ்வாறு கனையன் இசைவாகச் செலுத்திய அம்புகள் பட்டு
இகுலனின் வில் ஒடிந்தது. பின்னும், கவசம் பூண்டுள்ள இகுலனின்
மார்பையும் பிளக்குமாறு கனையன் அளவில்லாத அம்புகளை விசை
கொண்டு செலுத்துமாறு, விசை கொண்ட தன் அழகிய வில்லை வளையம்
போல் வளைக்க முற்பட்டான். அவ்வாறு மடித்த வில்லின் நுனி ஒடியவே,
தனக்கு வசை நேருமாறு எதிரிகளின் ஆரவார ஒலிகள் மிகுந்தன.