"முடியொடு முடி பட வரை முனைவன என, இடியொடு சினம் முதிர் எரி முகில் எதிர் பொரும். படியொடு பிரி பருப்பதம் என, அசனியின் வெடியொடு, மழை என விழுவன உபலமே.

     "சிகரத்தோடு சிகரம் மோத மலைகள் தம்முள் போரிடுவது போல்,
இடியோடு சினம் முதிர்ந்த நெருப்போடு கூடிய மேகங்கள் தம்முள்
எதிர்த்துப் போரிடும். அதனால் மண்ணை விட்டுப் பெயர்ந்து சிதறும்
மலை போல், இடியின் வெடியோசையோடு, பெருங்கற்கள் மழை போலச்
சிதறிவிழும்.

     "நெருக்கமாய் விழும் பெரிய கற்களால் தேர்களும் ஒடிந்து தூளாகிச்
சிதறும். யானைகளும் குதிரைகளும் கூட்டங் கூட்டமாய் மடியும்; படைக்
கருவி வகைகள் ஒடியும்; பகைவரெல்லாம் அழிவர். அவையெல்லாம் மேலும்
விழும் இடிகளோடு சேர்ந்து எரியும்.