நண் பகல் நெற்றி வான் நடக்கும் காலை, ஆழ் மண் பக ஊன்றி மேல் மலர்ந்த பூஞ்சினைச் செண்பகம் நிழற்றிய மணல் தண் திண்ணை மேல் ஒண் பகல் ஒத்து ஒளிர்ந்து உவந்து வைகினார்.

     நடுப் பகலில் பகலன் வானத்து உச்சியில் நடக்கும் வேளையில்,
மண் பிளக்குமாறு ஆழத்தில் வேர் ஊன்றி மேலே மலர்ந்த பூங்
கொம்புகளையுடைய சண்பக மரம் நிழல் செய்து நின்ற மணலாலான
குளிர்ந்த திண்ணையின்மேல், ஒளி பொருந்திய ஞாயிறுபோல் ஒளி வீசி
அம்மூவரும் மகிழ்ந்து தங்கினர்.

     வண்டுக் கூட்டங்கள் அணி வகுத்த தன்மையாய் இரைந்து
யாழொலியைப் பிறப்பிக்கவும், நீலமணி போன்ற குயில் இனங்கள்
மகிழ்ந்து பாடவும், தம் ஒளியால் காண்போர் கண்களைப் பிணிக்கும்
தன்மையாய் மயில் இனங்கள் சிறகுகளை விரித்து அங்கு ஆடவும்
கண்டு, குலைகள் வளைந்து பணிந்த தன்மை கொண்ட வாழையில்
நல்ல பழங்களை உண்டனர்.

     பழன் - பழம் என்பதன் கடைப் போலி.