"அது கண்டு பிலித்தேயர் சினங் கொண்டனர். ஒருநாள்
போருக்குரிய கருவி ஒன்றுமின்றிச் சஞ்சோன் தனிப்பட்டான் என்று
கண்டு, வைரம் போல் உறுதியான தோள்களை உடைய பிலித்தேயர்
எண்ணற்றவர் அவனைச் சூழ்ந்து, 'இனிச் சஞ்சோன் செத்தான்!' என்று
சீறிய வண்ணம், வலிமை வாய்ந்த அரிமாக்கள் போல ஓசை
உண்டாகுமாறு ஆரவாரம் செய்து அரிய போரைத் தொடங்கினர்.

     'இனிப் பட்டான்' என்றவிடத்து, 'பட்டான்' என்ற இறந்த காலம்,
இறத்தல் உறுதி என்பது பற்றி வந்த கால வழுவமைதி.

     "வெறுங் கையாய் நின்ற சஞ்சோன் அது கண்டு வீறு கொண்டான்;
இறந்த கழுதையின் வாய்த்தாடை எலும்பை உறுதியான வலிமை வாய்ந்த
தண்டாயுதத்திற்குச் சமமாகக் கையில் எடுத்துக்கொண்டான். பகைவர்
மீது சீறிக் கருவியை ஓங்கினான்; அரிய போராகப் பகைவர்
படைகளையெல்லாம் தான் ஒருவனாகவே தடுத்துத் தாங்கி நின்றான்;
பகைவர் மடியுமாறு ஆண் அரிமா போலத் தாக்கினான்.