"போரிடத்து எவரும் தனக்கு நிகரில்லாதவாறு பொலிந்த
வெற்றிகளை அணிந்து உயர்ந்தவனாகிய சஞ்சோன், கருமேகம் போன்ற
நீல மணிக் கூந்தலாகிய வலையில் அகப்பட்டு, ஒரு பூப் போன்ற அழகிய
பெண்ணின் அழகு முகத்தெதிரே தன் வலிமை குழைந்ததனால் அழிந்த
தன்மையை இனிக் கேட்டறிந்தோர், 'இம்மண்ணுலகில் பெண்மையைப்
போல் ஒப்பற்ற பழியும் கேடும் விளைவிப்பது எதுவுமே இல்லை!' என்பர்.

     "நீதி பொருந்திய ஆணைச் சக்கரத்தை உருட்டும் பெருஞ்
சிறப்புள்ள செங்கோலின் ஒளி வளமும் பெண்ணாசை என்னும்
கொடுமையால் குற்றத்திற்கு ஆளாகி வளையும் என்று உணராதவனாய்,
நஞ்சைப் பொதிந்து மூடிய அழகு பொறிக்கப்பட்ட விலைமகளாகிய
தாலிலை என்னும் நடனக் கலை தேர்ந்த ஒரு பெண்ணின் மீது தனக்குக்
குற்றம் பொருந்திக் கேடு விளையுமாறு ஆசை வைத்தான்.