"எமது பரம நாயகனாகிய ஆண்டவன் ஏவலால், உலகத்தையும்
அதன் திசைகள் நான்கையும் வானவரே காத்து வரும் முறையிடையே,
வானளாவிய இம்மலைக்குத் தனி உரிமை வந்த விதம் யாது?" என்று
பம்பரம் போல் கறங்கிய ஆசையோடு சூசை வினவவே, சட்சதன்
என்னும் அவ்வானவன் இதனைச் சொல்லினான் :

     "கதிரவன் போன்ற அழகிய உருவத்தோடு ஆண்டவனே இங்கு
வந்தடைந்ததனாலும், அழகிய மலர்களைக் கொண்ட காடு அடர்ந்த
இம்மலையின் உச்சியில் நின்று தந்த காட்சியாலும், விண்மீன்களைக்
கொண்ட அழகிய வானுலகைக் காட்டிலும் மிகவே புகழப்படுவதாகிய
சீனயி என்ற பெரிய மலையின் சிறப்பு இதுவாகும்.

     'அரோ' அசைநிலை.

     "ஞானமே வடிவான ஆண்டவன் முற்காலத்தில் மானிடர்
மனத்துள்ளே இயல்பாக எழுதி வைத்த வேத நூல் ஒழுங்கு முறையை,
பிற்காலத்தில், மேகத்தினின்று முழக்கம் தோன்ற, பொன்னில் பொறித்த
எழுத்துப் போலக் கல்லில் எழுதித் தந்தான். புன்செய்க்
கொல்லைகளிடையே குளிர்ந்து தோன்றும் இம்மலையின் பொலிவுக்குக்
காரணம் இதுவாகும்.